सावधान! चिकनगुनियाच्या रुग्णांवर स्टेराॅईडचा प्रयोग! अस्थिरोग तज्ज्ञ म्हणतात…

अकारण स्टेराॅईड घेणाऱ्या रुग्णांमध्ये गंभीर परिणामांचा धोका वाढला आहे. त्यातच नागपुरात सध्या चिकनगुनियाचे थैमान सुरू आहे. या रुग्णांत पूर्वीच्या तुलनेत सांधेदुखी व इतर त्रास दीर्घकाळ दिसतो. वेगवेगळी लक्षणेही विषाणूच्या जनुकीय बदलाचे संकेत देत आहेत, अशी माहिती उपराजधानीतील अस्थिरोग तज्ज्ञ व विदर्भ ऑर्थोपेडिक्स सोसायटीचे (व्हीओएस) अध्यक्ष डॉ. सत्यजित जगताप, सचिव डॉ. समीर द्विदमुठे, व्हाॅसकाॅन परिषदेचे सचिव डॉ. अलंकार रामटेके यांनी मंगळवारी झालेल्या पत्रकार परिषदेत दिली. एक ते दीड महिन्यानंतरही लक्षणे कमी होत नसलेल्या काही रुग्णांनाच स्टेराॅईड औषधांची गरज असते. तेही अत्यल्प प्रमाणात तज्ज्ञ डॉक्टरांमार्फतच घ्यायला हवी, असेही या डॉक्टरांनी सांगितले.

हेही वाचा : नागपूर: नियतीचा खेळ, अखेर प्र-कुलगुरूंना पद सोडण्याचे आदेश, शिक्षण मंचाला मोठा धक्का

नवीन लक्षणे कोणती?

चिकनगुनियाग्रस्तांमध्ये पूर्वी ताप, शरीरात दुखणे, हात-पायावर सूज अशी काही लक्षणे दिसत होती. उपचारानंतर एक आठवडा ते दीड महिन्यात ही लक्षणे जायची. यावेळी मात्र अनेक रुग्णांमध्ये दीड महिन्यानंतरही हातापायात वेदना, चेहरा व नाकाच्या त्वचेवर काळे डाग, अशी लक्षणे दिसत आहेत. वेदनाही दीड महिन्याहून जास्त काळ राहत असल्याचे डॉ. सत्यजित जगताप यांनी सांगितले.

व्हाॅसकाॅन परिषद ४ ऑक्टोबरपासून

विदर्भ ऑर्थोपेडिक्स सोसायटी (व्हीओएस)तर्फे व्हाॅसकाॅन परिषद नागपुरातील हाॅटेल सेंटर पाॅईंटमध्ये ४ ते ६ ऑक्टोबरला आयोजित करण्यात आली आहे. या परिषदेत विविध विषयांवर मंथन होणार आहे. याप्रसंगी डॉ. मिलिंद चौधरी, डॉ. शेखर भोजराज, डॉ. अशोक जोहरी, डॉ. चंदनवाले, डॉ. सुधीर बाभूळकर, डॉ. एस. सुब्रमण्यम मार्गदर्शन करतील, अशी माहिती डॉ. समीर द्विदमुठे यांनी दिली.

हेही वाचा : चंद्रपूर: तालुका युवक काँग्रेसच्या नेत्यावर अल्पवयीन विद्यार्थीनीवर अत्याचाराचा केल्याचा आरोप, पोक्सो अंतर्गत गुन्हा दाखल

मोडलेली हाडे तारांनी जोडण्याचे तंत्र

या राष्ट्रीय परिषदेला इटलीहून डॉ. मारिओ रंगारी येणार आहेत. ते मोडलेली हाडे तारेपासून जोडण्याचे नवीन तंत्र शिकवणार आहेत. या पद्धतीच्या तंत्रावर सविस्तर कार्यशाळेची ही पहिलीच वेळ आहे, अशी माहिती डॉ. अलंकार रामटेके यांनी दिली.