लोकसत्ता टीम
नागपूर : एक युवक कौटुंबिक कारणातून घरात गळफास घेऊन आत्महत्या करण्याचा प्रयत्न करीत होता. ही माहिती अजनी पोलिसांना मिळाली. दोन पोलीस कर्मचाऱ्यांनी लगेच त्या युवकाच्या घराकडे धाव घेतली. गळफास घेण्यापूर्वीच पोलिसांनी दरवाजा तोडून युवकाचा जीव वाचवला. ही घटना मंगळवारी रात्री नऊ वाजता अजनी रेल्वे क्वार्टरमध्ये घडली. ‘त्या’ युवकाचा जीव वाचवण्यात यश आल्याने अजनी पोलीस देवदूत ठरले आहे.
आणखी वाचा-“असावे घरकुल ठिकठिकाणी”, अमर काळे यांच्या संपत्तीचे विवरण असे…
अजनी रेल्वे कॉर्टरमध्ये राहणारे रवी बोरा हे तणावात होते. त्यांनी कौटुंबिक वादातून मंगळवारी रात्री नऊ वाजता त्यांनी घरात गळफास घेऊन आत्महत्या करण्याचा प्रयत्न केला. दरम्यान, अजनी पोलीस ठाण्याचे पोलीस निरीक्षक गजानन तामटे यांना फोनवरून माहिती मिळाली. त्यांनी लगेच पोलीस कर्मचारी दीपक धांडे आणि सूरज तिवारी यांना घटनास्थळावर पाठवले. दोन्ही कर्मचारी बंद दार तोडून आत शिरले व त्याचा जीव वाचवला. या कामगिरीची दखल पोलीस आयुक्त डॉ. रवींद्रकुमार सिंगल यांनी घेतली. बुधवारी दुपारी ठाणेदार तामटे, दीपक आणि तिवारी यांचे अभिनंदन करून सत्कार केला.
