नागपूर : एका चोरट्याने अनेक ठिकाणी घरफोड्या केल्या. चोरलेले दाग-दागिने विकून त्याने चक्क कार घेतली. कार घेऊन ऐटीत फिरायला लागला. मात्र, घरफोडी करण्यासाठी कारने टेहळणी करताना चोरट्याला पोलिसांनी पकडले. त्याने चोरीच्या पैशातून मौजमजा करायला कार घेतल्याची कबुली दिली. संदीप टेंभरे (२४) रा. हुंडा, मध्यप्रदेश असे अटकेतील आरोपीचे नाव आहे. त्याच्या ताब्यातून ६ लाख ५० हजार रुपये किंमतीची कार जप्त करण्यात आली.
वाठोडा पोलीस ठाण्याअंतर्गत राहणाऱ्या फिर्यादी प्रियंका जांगडे (३१) या बाहेरगावी गेल्या असताना आरोपीने घरफोडी करीत ४ लाख २३ हजार रुपये किंमतीचे दागिने चोरले. त्यानंतर जिजामाता नगरातील संजय नाकाडे (४४) यांच्या घरी चोरी केली. तसेच हुडकेश्वर पोलीस ठाण्याअंतर्गत घरफोडी करीत ओम शर्मा रा. गंगाबाई घाट याच्या मदतीने संपूर्ण मुद्देमाल तुषार कावडे रा. लालगंज याला विकला. मिळालेल्या पैशात त्याने साडेसहा लाखांची कार खरेदी केली आणि कारने ऐटीत फिरत होता. चोरी करण्यासाठी तो कारने टेहळणी करायला जाऊ लागला.
हेही वाचा : धोकादायक ‘मेडीगड्डा’ धरणामुळे दोन राज्यांतील नागरिकांचा जीव टांगणीला! राजकीय आरोप- प्रत्यारोप
दरम्यान गुन्हा दाखल झाल्यानंतर संबधित पोलीस ठाण्यातील कर्मचारी तसेच गुन्हे शाखेचे घरफोडी विरोधी पथक समांतर तपास करीत होते. गुन्हे शाखेच्या पथकाला मिळालेल्या खात्रीशीर माहितीवरून पोलिसांनी त्याच्यावर पाळत ठेवली. सापळा रचून त्याला ताब्यात घेतले. सखोल चौकशीत त्याच्याकडून तीन गुन्हे उघडकीस आले. चोरीच्या पैशातून कार खरेदी केल्याचे त्याने पोलिसांना सांगितले. या प्रकरणात चोरीचा मुद्देमाल विक्रीसाठी मदत करणारा आणि खरेदी करणाऱ्याचा पोलीस शोध घेत आहेत. ही कारवाई गुन्हे शाखेचे पोलीस उपायुक्त यांच्या मार्गदर्शनात करण्यात आली.
