नागपूर : अरबी समुद्रात कमी दाबाचा पट्टा तयार झाला असला तरी राज्यात उन्हाच्या झळा कायम आहे. तर कमी दाबाच्या पट्ट्यामुळे पावसाचा इशारा देण्यात आला आहे. यामुळे राज्यात काही भागांत उन तर काही भागांत हलक्या पावसाची हजेरी आणि काही ठिकाणी ढगाळ हवामान राहणार आहे.
विदर्भ, मराठवाडा, उत्तर महाराष्ट्र तसेच मुंबई आणि पुण्यात तापमानाचा पारा वाढला आहे. विदर्भ आणि मराठवाड्यातील बहुसंख्य जिल्ह्यात तापमानात मोठी वाढ झाली आहे. उन्हाचा पारा वाढल्याने उकाड्यामुळे नागरिक त्रस्त आहेत. राज्यातील आणि विशेषकरून विदर्भातील कमाल तापमानाचा पारा ३५ ते ३६ अंश सेल्सिअसजवळ आहे. तर मध्य महाराष्ट्र आणि मराठवाड्यात ३४ अंश सेल्सिअसवर एवढे आहे.
हेही वाचा – शरद पवार-प्रकाश आंबेडकरांमध्ये चहा पितांना गडबड! रामदास आठवले म्हणाले…
विदर्भात मागील दहा दिवसांपासून पारा सरासरी ३५ अंशांवर आहे. राज्यातून मोसमी पाऊस माघारी फिरल्यावर हवेतील बाष्पाचे प्रमाण कमी झाले आहे. त्यामुळे सूर्यप्रकाश थेट जमिनीवर येऊन तापमानात वाढ होत आहे. ही स्थिती २५ ऑक्टोबरपर्यंत कायम राहण्याचा अंदाज आहे. दरम्यान, ऑक्टोबरनंतर राज्यात थंडी पडण्यास सुरुवात होईल.
