Yavatmal Crime News : लहान भावाची हत्या करणाऱ्या मोठ्या भावाने केली आत्महत्या

मनीषने घेतलेली दुचाकी दुरुस्त करून त्याचा लहान भाऊ दिनेश शिरपुले हा वापरत होता. त्यावरून दोघा भावांमध्ये वाद होत होते. दरम्यान शुक्रवार, २८ मार्च रोजी रात्री ८.३० ते ९ वाजताच्या सुमारास मनीषने लहान भाऊ दिनेश याच्या डोक्यावर फावड्याने वार करून त्याची हत्या केली. लहान भावाची हत्या करून मोठा भाऊ घटनास्थळावरून पसार झाला होता. या घटनेची माहिती मिळताच खंडाळा पोलिसांनी आरोपी मनीष शिरपुले याच्यावर गुन्हा दाखल करून शोधमोहीम सुरू केली होती.

पुसद तालुक्यातील शेबांळपिंप्री हे गाव विदर्भ व मराठवाड्याच्या सीमेवर आहे. या गावापासून काही अंतरवर हिंगोली तालुक्यातील कळमनुरी हे गाव आहे. या गावालगत असलेल्या कळमनुरी परिसरात त्याचे मोबाईल लोकेशन दिसत होते. त्या ठिकाणी खंडाळा पोलिसांनी आरोपीचा शोध घेतला, मात्र आरोपी पोलिसांच्या हाती लागला नाही. दरम्यान, आज सोमवारी सकाळी दिनेशची हत्या करणारा मनीष हा कळमनुरी परिसरातील एका टेकडीवर आहे, अशी माहिती खंडाळा पोलिसांना मिळाली होती. त्यावरून पोलीस उपनिरीक्षक कायंदे, गोपाल पांडे हे त्या ठिकाणी गेले. कळमनुरी पोलिसांची मदत घेऊन किंचाळेश्वर महादेव मंदिराच्या मागे दत्त मंदिर टेकडीजवळ पोहचले. यावेळी दिनेशची हत्या करणारा आरोपी मोठा भाऊ मनीष शिरपुले याने गळफास घेवून आत्महत्या केल्याचे दिसून आले.

कळमनुरी पोलिसांनी घटनास्थळ पंचनामा करून मृतदेह शवविच्छेदनासाठी रुग्णालयात पाठविला. पुढील तपास कळमनुरी पोलीस करीत आहे. या घटनेची वार्ता पसरताच शेबांळपिंप्री येथे शोककळा पसरली.