बीड, परभणीतील प्रकरणांची निवृत्त न्यायमूर्तींमार्फत चौकशी; मुख्यमंत्री देवेंद्र फडणवीस यांची विधानसभेत घोषणा

बीड जिल्ह्यात सरपंच संतोष देशमुख यांची झालेली हत्या निर्घृण असून ती खंडणी मागितल्याच्या प्रकरणाशी निगडीत आहे. ही हत्या अतिशय क्रूरपणे झाली, त्यांच्या डोळ्यांना मार बसला होता. वाल्मिक कराड याचा खंडणी प्रकरणातील आरोपींबरोबर असलेल्या संभाषणाचे व अन्य पुरावे पाहता गुन्ह्यात सहभाग आहे. मात्र कराड याचा देशमुख हत्येतही सहभाग असल्याचे एसआयटी चौकशीत दिसून आले, तर त्याचे सत्ताधारी किंवा विरोधी पक्षातील कोणत्याही राजकीय नेत्याबरोबर संबंध असले, तरी त्याचा मुलाहिजा न बाळगता ‘मोक्का’नुसार कारवाई केली जाईल, असे फडणवीस यांनी जाहीर केले. मात्र कराड याचे मंत्री धनंजय मुंडे यांच्याशी संबंध असल्याचा आणि सरकार मुंडे यांना वाचवत असल्याचा आरोप करीत विरोधकांनी सभात्याग केला.

हेही वाचा >>>महाराष्ट्रावर पहिला हक्क मराठी माणसाचाच

परभणी हिंसाचार प्रकरणात मृत सोमनाथ सूर्यवंशीच्या शवविच्छेदनात त्याचा श्वसनाचा आजार व आधीच्या जखमा निष्पन्न झाल्या आहेत. तरीही याप्रकरणातील सत्य पुढे यावे, यासाठी न्यायालयीन चौकशीचे आदेश देण्यात येतील, असे फडणवीस यांनी जाहीर केले.

दोन्ही कुटुंबीयांना प्रत्येकी १० लाख

बीड व परभणी प्रकरणांची चौकशी स्वतंत्रपणे होणार असून, अहवाल तीन ते सहा महिन्यांमध्ये येईल. हत्या झालेले सरपंच देशमुख यांच्या कुटुंबियांना तर परभणी प्रकरणी पोलीस कोठडीत मृत्यू झालेल्या सोमनाथ सूर्यवंशी यांच्या कुटुंबीयांना प्रत्येकी १० लाख रुपयांचे अर्थसहाय्य दिले जाईल, असे मुख्यमंत्री फडणवीस यांनी विधानसभेत जाहीर केले.