अकोला : कर्णबधिरांच्या शिक्षणासाठी संवादात्मक शिक्षण अ‍ॅप निर्मिती अकोल्यातील ‘लर्न अँड एम्पॉवर’ संस्थेनी केली आहे. कर्णबधिरांना सुलभपणे शिकण्यासाठी याचा लाभ होणार आहे.
आंतरराष्ट्रीय मूकबधिर सप्ताहानिमित्त ‘लर्न अँड एम्पॉवर’ या स्टार्टअपच्या संस्थापकांचा सत्कार जिल्हाधिकारी अजित कुंभार यांच्या हस्ते नुकताच करण्यात आला. जिल्ह्यातील युवकांमध्ये चांगली उद्यमशीलता व संशोधन क्षमता असून, योग्य संधी मिळाल्यास ते राष्ट्रीय व आंतरराष्ट्रीय बाजारपेठेत स्पर्धा करू शकतात, असे जिल्हाधिकारी अजित कुंभार म्हणाले.
उपक्रमाचे सहसंस्थापक व सीओओ प्रबोध महाजन, शुभंकर पोतदार, प्र. समाजकल्याण अधिकारी शरद पुंड, शासकीय मुकबधीर विद्यालयाच्या मुख्याध्यापिका अलका मोदक आदी उपस्थित होते.
संस्थेतर्फे कर्णबधिर बांधवांना शिक्षणासाठी मदत करण्यासाठी संवादात्मक शिक्षण अ‍ॅपची निर्मिती करण्यात आली. महाराष्ट्र स्टार्टअप यात्रा २०२२ मध्ये संस्थेला राज्यस्तरीय पारितोषिकही मिळाले आहे. या स्टार्टअपद्वारे ‘रेझोनेट लर्निंग’ व ‘साईनअसिस्टिव्ह प्लॅटफॉर्म’चे सादरीकरण करण्यात आले. ही दोन्ही ॲप्लिकेशन्स मूकबधिर विद्यार्थ्यांना शिक्षणात सहाय्यकारी ठरू शकतील, असे संस्थेच्या प्रतिनिधींनी सादरीकरणात सांगितले.
