गोंदिया : राहुल गांधी हे उद्धव ठाकरेंच्या भेटीला मातोश्रीवर येणार अशा बातम्या येत आहेत. पण, ते काही खरे नाही. केवळ अफवा पसरवली जात आहे, अशा शब्दात काँग्रेस प्रदेशाध्यक्ष नाना पटोले यांनी अशी भेटीची शक्यताच फेटाळून लावली.
डॉ. बाबासाहेब आंबेडकर जयंती निमित्त गोंदिया जिल्हयात आले असता ते माध्यमांशी बोलत होते. पटोले म्हणाले, विरोधकांनी महाविकास आघाडीच्या नागपुरात होणाऱ्या वज्रमूठ सभेला विरोध दर्शविला. मात्र, न्यायालयाने वज्रमूठ सभेला परवानगी दिली. आता भाजपाला सभा बघूनच कळेल की महाविकास आघाडीची वज्रमूठ किती मजबूत आहे.
हेही वाचा – भंडारा अर्बन बँकेच्या सहा संचालकांचे अचानक राजीनामे; सहकार क्षेत्रात वादळ
राज्याचे उपमुख्यमंत्री देवेंद्र फडणवीस यांना टीका, टिंगल करण्यापलीकडे दुसरे कोणतेच काम नाही. त्यांनी आमच्याकडे लक्ष देण्यापेक्षा जनतेच्या प्रश्नांकडे लक्ष द्यावे. किमान महाराष्ट्रातील जनतेच्या समस्या तरी सुटतील, असेही पटोले म्हणाले.
