आमदारांनी केलेला उठाव यशस्वी झाला नसता, तर एकनाथ शिंदे यांनी गोळी झा़डून घेतली असती, असा दावा शालेय शिक्षणमंत्री दीपक केसरकर यांनी केला होता. यावरून राजकीय क्षेत्रात एकच खळबळ उडाली होती. राष्ट्रवादी काँग्रेसचे आमदार जितेंद्र आव्हाड यांनी यावर प्रतिक्रिया व्यक्त केली आहे. “सत्ता मिळाली नाहीतर, माझ्या जीवाचं बरे वाईट करून घेईन, हेच त्यांचं मत होते,” असं जितेंद्र आव्हाड म्हणाले. ते नागपुरात प्रसारमाध्यमांशी बोलत होते.
जितेंद्र आव्हाडांनी म्हटलं की, “सत्ता हे सर्वस्व आहे. सत्ता नाही मिळाली, तर माझ्या जीवाचं बरे वाईट करून घेईन, हेच त्यांचं मत होते. लोकशाहीत असं नसतं. तुम्हाला जनतेच्या सामोरे जावं लागतं. जय-पराजय हा अविभाज्य घटक आहे.”
हेही वाचा : “अहो, तुम्ही नुसतीच दाडी कुरवाळत बसता, मग…”, अजित पवारांनी घेतला मुख्यमंत्र्यांचा समाचार
“मंत्रिमंडळ स्थापन होण्याच्या आधीपासून एकनाथ शिंदे हे उद्धव ठाकरेंबरोबर नव्हते. याचा व्यक्तीगत पुरावा कुणाला पाहिजे असेल तेव्हा देण्यास मी तयार आहे. उद्धव ठाकरेंच्या आधी मी मुख्यमंत्री झालं पाहिजे, असं एकनाथ शिंदेंच्या मनात होतं,” असा दावाही जितेंद्र आव्हाडांनी केला आहे.
हेही वाचा : उद्धव ठाकरे आणि आदित्य ठाकरेंच्या सुरक्षेत कपात केली? मुंबई पोलीस म्हणाले…
‘गद्दार’, ‘खोके’ याशिवाय विरोधकांकडे काही शिल्लक राहिलं नाही, असं वक्तव्य मंत्री गुलाबराव पाटील यांनी केली होतं. याबद्दल विचारल्यावर जितेंद्र आव्हाड म्हणाले, “तुम्ही केलं ते महाराष्ट्राच्या संस्कृतीच्या विरोधात आहे. कर्नाटकातील ४० टक्क्यांवर सगळं सरकार गेलं. तुमचे ५० टक्के तर घराघरात पोहचले आहेत. गाढव, म्हैस आणि घोड्यांवर ५० खोके लिहितात. तुमच्याबद्दल लोकांच्या मनात राग किती आहे, याचा विचार करा.”
