४० हजारांची लाच; कनिष्ठ अभियंता एसीबीच्या जाळ्यात, महागड्या कारचा छंद…

त्या कामाचे ९ लाख ८० हजार रुपयांचे बिल थकले होते. काम पूर्ण करणाऱ्या कंत्राटदाराने हे बिल प्रशासनाकडे सादर केले. त्यानंतर करेंजकर यांनी कंत्राटदाराला बिलाच्या एकूण रक्कमेपैकी आठ टक्के रक्कम मागितल्याचा आरोप आहे. सुरुवातीला करेंजकर यांनी मागितलेली रक्कम मोठी होती. परंतु तडजोडीनंतर ४० हजार रुपयांत सौदा ठरला. कनिष्ठ अभियंता असलेल्या सुहास करेंजकर यांना पकडल्यानंतर आता त्यांच्या संपत्तीची चौकशी केली जाणार आहे. करेंजकर यांच्याकडे चार ते पाच बंगले असल्याची चर्चा आता भंडारा जिल्हा परिषदेच्या वर्तुळात सुरू झाली आहे.

विशेष म्हणजे करेंजकर दरवर्षी नवीन कारही खरेदी करतात. कारचे कोणतेही मॉडेल त्यांनी एक वर्षापेक्षा जास्त काळ वापरलेले नाही, असं जिल्हा परिषदेतील अधिकारी, कर्मचाऱ्यांनी एसीबीच्या पथकाला सांगितले. त्यामुळं करेंजकर त्यांच्या तथाकथित सर्व बंगल्यांची झाडाझडती आता लाचलुचपत प्रतिबंधक विभाग करणार असल्याचं सांगण्यात येत आहे.

करेंजकर यांना महागड्या कारचाही शौक आहे. त्यामुळं त्यांनी सुरुवातीपासून आजपर्यंत खरेदी केलेल्या सर्व वाहनांचा तपशिलही आता बाहेर काढला जाणार आहे. बिल काढण्यासाठी करेंजकर यांनी मागितलेली रक्कम ते स्वतःच खिशात टाकणार होते की त्यात अन्य कोणाचा वाटा होता, याचाही तपास केला जाणार आहे. भंडारा जिल्हा परिषदेतील या गैरप्रकाराची तक्रार एका नेत्याच्या साळ्याने केल्याचे बोलले जात असून त्यामुळे आता राजकीय व प्रशासनात उलट सुलट चर्चा रंगू लागल्या आहेत.