Katol Assembly Election 2024 : काटोल हे नागपूर जिल्ह्यातील शहर असून ते जिल्ह्यातील १४ तालुक्यांपैकी एक आहे. काटोल हे संत्रा व्यापाराचे प्रमुख केंद्र आहे. कापूस, सोयाबीन आणि इतर काही पिकांचे या क्षेत्रात उत्पादन घेतले जाते. माजी गृहमंत्री अनिल देशमुख हे काटोल विधानसभा मतदारसंघाचे प्रतिनिधित्व करतात. देशमुख हे चारवेळा काटोल मतदारसंघातून विधानसभेवर निवडून गेले आहेत.
अनिल देशमुख हे राष्ट्रवादी काँग्रेस शरदचंद्र पवार पक्षाचे ज्येष्ठ नेते आहेत. २०१९ ते २०२१ साली महाराष्ट्रातील महाविकास आघाडीच्या सरकारमध्ये त्यांनी गृहमंत्री पद भूषविले होते. मात्र मनी लॉन्ड्रिंगच्या आरोपानंतर त्यांनी २०२१ साली गृहमंत्रीपदाचा राजीनामा दिला होता. अनिल देशमुख यांना सक्तवसुली संचालनालयाने अटक केली होती.
अनिल देशमुख हे १९९५ साली पहिल्यांदा अपक्ष उमेदवार म्हणून काटोल मतदारसंघातून महाराष्ट्र विधानसभेवर निवडून गेले होते. १९९५ मध्ये त्यांनी भाजप शिवसेना सरकारमध्ये राज्यमंत्री म्हणून काम केले. नंतर त्यांनी राष्ट्रवादी काँग्रेस पक्षात प्रवेश केला. पुढे काँग्रेस आणि राष्ट्रवादी काँग्रेस पक्षाच्या सरकारमध्ये त्यांनी विविध मंत्रिपदांवर काम केले. देशमुख यांनी शिक्षण आणि सांस्कृतिक, क्रीडा आणि युवा व्यवहार, माहिती आणि जनसंपर्क राज्यमंत्रीपद भूषविले. सार्वजनिक बांधकाम विभाग मंत्री आणि अन्न व नागरी पुरवठा आणि ग्राहक व्यवहार मंत्रीपदही सांभाळले.
अनिल देशमुख यांनी २०१४ पर्यंत काटोल मतदारसंघाचे प्रतिनिधित्व केले. मात्र २०१४ च्या महाराष्ट्र विधानसभा निवडणुकीत अनिल देशमुख हे त्यांचे पुतणे आशिष देशमुख यांच्याकडून पराभूत झाले. परंतु २०१९ च्या विधानसभा निवडणुकीत त्यांनी पुन्हा राष्ट्रवादी काँग्रेस पक्षातर्फे उमेदवार म्हणून निवडणूक लढवली व आपला बालेकिल्ला परत मिळवला. २०२४ च्या निवडणुकीसाठी देशमुख यांच्यासमोर तुल्यबळ उमेदवार पुढे करणे हे आव्हान भाजपासमोर असणार आहे.
