यवतमाळ : कळंब-बाभूळगाव मार्गावर मजूर घेऊन जात असलेल्या वाहनाने तीन पादचाऱ्यांना जबर धडक दिली. त्यानंतर वाहन पलटले. या अपघातात एक जण ठार, तर २५ जण जखमी झाले. जखमींपैकी दोघे गंभीर आहेत. यदु मोतीराम जाधव (५५), रा. नायगाव, ता. बाभूळगाव असे मृताचे नाव आहे. हा अपघात आज बुधवारी सकाळी नायगाव (ता. बाभूळगाव) येथे झाला.
चंद्रपूर येथील मजूर पीकअप वाहनाने बुलढाणा येथे जात होते. चालकाचे नियंत्रण सुटल्याने वाहनाने पादचाऱ्यांना धडक दिली. या अपघातात ममता सुभाष मेश्राम, रमेश सखाराम कांबळे (४५) सुवर्णा विनायक लोनबले (३४), जोस्ना हेमराज हजारे (३०), ममता सुधाकर मेश्राम (३५), सुषमा दिनेश मेश्राम (३५), शालू गुरुदास जराते (३५), हेमराज मनोहर हजारे (३५), विनायक बापूजी लोनवले (३५), डाकराम केवलराम बोरसे (३५), मोरेश्वर कालिदास गेडाम (३५), जयश्री यादव लोनवले (३०), निशा हेमंत मडावी (३०), हे जखमी झाले. सर्व जखमींना यवतमाळ येथील वसंतराव नाईक शासकीय वैद्यकीय महाविद्यालयात दाखल करण्यात आले आहे. जखमींपैकी दोघे गंभीर आहेत. अपघातात तरुणांची संख्या अधिक आहे. अपघातानंतर मार्गावरील वाहतूक विस्कळीत झाली होती. बाभूळगाव पोलीस पुढील तपास करीत आहेत
