एका वकिलाने महिलेशी शारीरिक संबंध प्रस्थापित केले आणि तिचे अश्लील छायाचित्र आणि चित्रफित तयार केली. तिचे वारंवार लैंगिक शोषण केल्यानंतर लग्नास नकार देऊन विश्वासघात केला. या प्रकरणी गिट्टीखदान पोलिसांनी पीडित महिलेच्या तक्रारीवरून आरोपी वकिलावर गुन्हा नोंदविला आहे. रियाज ताज मोहम्मद शेख (४३) रा. गणेशपेठ असे आरोपीचे नाव आहे.
रियाज शेख हा स्वत:ला वकील असल्याचे सांगतो. त्याचे लकी रेस्टॉरेंट नावाने हॉटेल आहे. यावर्षी फेब्रुवारी महिन्यात रियाजची पीडित ३८ वर्षीय महिलेशी ओळख झाली. दोघांमध्ये प्रेमसंबंध निर्माण झाले. त्याने महिलेला लग्नाचा प्रस्ताव दिला. लग्नाचे आमिष दाखवून रियाजने महिलेशी वारंवार शारीरिक संबंध प्रस्थापित केले.
हेही वाचा : “अडीच वर्षांत जे पेरलंय, ते आता उगवतंय”, प्रभादेवीतील घटनेवरून मनसेचा शिवसेनेला टोला!
तो महिलेशी अनैसर्गिक कृत्यही करीत होता. त्याने महिलेचे अश्लील छायाचित्र काढले होते. ते छायाचित्र समाजमाध्यमावर प्रसारित करण्याची धमकी देऊन तिचे लैंगिक शोषण करीत होता. त्याच्यावर लग्नासाठी दबाव टाकला असता त्याने थेट नकार दिला. अश्लील चित्रफित प्रसारित करून बदनामीची धमकी दिली. महिलेने गिट्टीखदान पोलिसात तक्रार केली. पोलिसांनी विविध कलमान्वये गुन्हा नोंदवून रियाजला अटक केली.
