मराठा समाजाचा ओबीसीमध्ये समावेश करण्यात येऊ नये, राज्यामध्ये बिहारच्या धर्तीवर जातनिहाय सर्वेक्षण करण्यात यावे तसेच प्रत्येक जिल्ह्यात ओबीसी मुला-मुलींसाठी स्वतंत्र वसतिगृह सुरू करण्यात यावे या मागण्यांसाठी मागील २२ दिवसांपासून राष्ट्रीय ओबीसी महासंघाच्या नेतृत्वात सुरू असलेल्या आंदोलनावर आज अखेर २९ सप्टेंबर रोजी तोडगा निघाला.
हेही वाचा >>> अकोला: नितीन गडकरींमुळेच मी कृषीमंत्री; धनंजय मुंडेंच्या वक्तव्याने भुवया उंचावल्या
मुंबईतील सह्याद्री अतिथी गृहात आज राज्यातील ओबीसी नेत्यांच्या शिष्टमंडळासोबत मुख्यमंत्री एकनाथ शिंदे, उपमुख्यमंत्री देवेंद्र फडणवीस व उपमुख्यमंत्री अजित पवार यांच्या उपस्थितीत झालेल्या बैठकीमध्ये ओबीसींच्या सर्व मागण्या तत्वतः मान्य करण्यात आल्या. त्यामुळे नागपुरात सुरू असलेले साखळी उपोषण उद्या, दुपारी ४ वाजता मागे घेण्यात येणार आहे. आंदोलन स्थगित करीत असल्याची अधिकृत घोषणा उद्या राष्ट्रीय ओबीसी महासंघातर्फे संविधान चौकात जाहीर करण्यात येईल, असे आंदोलकांनी सांगितले.
