लोकसत्ता टीम
नागपूर : नागपूर लोकसभा मतदारसंघात मतमोजणी सुरू आहे. पहिल्या फेरीचे मतदान जाहीर करण्यात आले आहे. त्यानुसार भाजपचे उमेदवार नितीन गडकरी यांनी काँग्रेसचे उमेदवार व पश्चिम नागपूरचे आमदार विकास ठाकरे यांच्या मतदारसंघातून मताधिक्य मिळवले असल्याचे दिसून येते.
गडकरी विरुद्ध ठाकरे ही लढत अटीतटीची होईल, असा अंदाज बांधण्यात येत होता. मात्र पहिल्या फेरीत मतदारांचा कौल कसा असेल असा अंदाज आला आहे. पहिल्या फेरीत मोजणी झालेल्या ६७,६२३ मतांपैकी गडकरी यांना ३९,३८४ मते मिळाली तर ठाकरे यांना २६,३३८ मते मिळाली. गडकरी यांना ठाकरे यांचा विधानसभा मतदारसंघ पश्चिम नागपूरमधून ६१२९ तर ठाकरे यांना ५३१८ मते मिळाली. देवेंद्र फडणवीस यांच्या दक्षिण-पश्चिम या विधानसभा मतदारसंघातूनही गडकरी यांना पहिल्या फेरीत आघाडी मिळाली आहे.
आणखी वाचा-Maharashtra Lok Sabha Election Result 2024 : यवतमाळ-वाशीम लोकसभा मतदारसंघात मविआची विजयाकडे वाटचाल
या मतदारसंघात गडकरी यांना ७२१३ आणि ठाकरे यांना ३०२४ मते मिळाली. दक्षिण नागपूरमध्ये गडकरी यांना ६७१९ तर ठाकरे यांना २६०८ मते मिळाली. पूर्व नागपूरमध्ये अपेक्षेप्रमाणे भाजपला मताधिक्य मिळाले. गडकरी यांना ६९१९ तर ठाकरे यांना ४८७२, मध्य नागपूरमध्येही गडकरी यांना चांगली मते मिळाली आहे. येथे गडकरी यांनी ९१०१ तर ठाकरे यांना २६९१ मते मिळाली. उत्तर नागपूरमध्ये मात्र अपेक्षेप्रमाणे पहिल्या फेरीपासूनच मतदारांचा कौल काँग्रेसच्या बाजूने दिसून येत आहे. येथे गडकरी यांच्यापेक्षा ठाकरे यांना अधिक मते मिळाली आहे. ठाकरे यांना ७८२५ तर गडकरी यांना ३२५३ मते मिळाली.
