नागपूर : राज्य महामार्गाच्या तुलनेत राष्ट्रीय महामार्गांवर १ जानेवारी २०२४ ते २९ फेब्रुवारी २०२४ दोन महिन्यात दुप्पट अपघात होऊन मोठ्या संख्येने मृत्यू झाले आहेत. राज्य महामार्ग आणि राष्ट्रीय महामार्गांवरील अपघाताची आकडेवारी एकत्र केल्यास या काळात २ हजार ८०२ अपघातात १ हजार ४१८ मृत्यू झाले.
राज्यात १ जानेवारी ते २९ फेब्रुवारी २०२४ दरम्यान राज्य महामार्गावर ९८४ अपघातात ५१८ नागरिकांचा तर राष्ट्रीय महामार्गावर १ हजार ८१८ अपघातात ९०० नागरिकांचा मृत्यू झाला. ही आकडेवारी बघता महाराष्ट्रात राज्य महामार्गाच्या तुलनेत राष्ट्रीय महामार्गावर जवळपास दुप्पट अपघात व मृत्यू झाल्याचे माहितीच्या अधिकारातून सामाजिक कार्यकर्ते अभय कोलारकर यांनी पुढे आणले आहे.
हेही वाचा…आमच्यातील काही स्वार्थी लोक माझ्या विरोधात विषारी प्रचार करताहेत!…विजय वडेट्टीवार यांचा रोख कुणावर?
नागपूर शहर, पुणे शहर, मुंबई शहर, छत्रपती संभाजीनगर शहर या चार शहरांची १ जानेवारी २०२३ ते २९ फेब्रुवारी २०२४ दरम्यानची अपघातांची आकडेवारी बघता सर्वाधिक २ हजार ८९२ अपघातात मुंबईत ४२६ नागरिकांचा मृत्यू झाला. नागपुरात १ हजार ४२६ अपघातात ३८२ मृत्यू, पुण्यात १ हजार ४७१ अपघातात ४१३ मृत्यू, छत्रपती संभाजीनगरमध्ये ७०८ अपघातात २३४ मृत्यू झाले.
हेही वाचा…५०० रुपयांसाठी केली हत्या, न्यायालयाने दिली जन्मठेपेची शिक्षा
छोट्या वाहनांच्या अपघतात मृत्यू अधिक
राज्यात २०१९ मध्ये बसच्या १ हजार ११० अपघातात २४६ मृत्यू तर कार, टॅक्सी, व्हॅन व हलक्या वाहनांच्या ३ हजार २७३ अपघातात १ हजार ५७६ मृत्यू झाले. ट्रक, लॉरीच्या १ हजार ९६४ अपघातात ६२७ मृत्यू झाले. २०२० मध्ये बसच्या ३५४ अपघातात १०६ मृत्यू तर कार, टॅक्सी, व्हॅन, हलक्या वाहनांच्या ३ हजार २७३ अपघातात १ हजार ५७६ मृत्यू झाले. ट्रक, लॉरीच्या १ हजार ९६४ अपघातात ६२७ मृत्यू झाले. २०२२ मध्ये बसच्या ४८३ अपघातात ११९ मृत्यू तर कार, टॅक्सी, व्हॅन व हलक्या मोटार वाहनांच्या ५ हजार ४५ अपघातात २ हजार २२१ मृत्यू झाले. ट्रक, लॉरीच्या १ हजार ७६२ अपघातात ८०६ मृत्यू झाले.
