वर्धा: जिल्ह्यातील चारही मतदारसंघात काँग्रेस पराभूत झाली आहे. मयुरा अमर काळे, शेखर शेंडे, रणजित कांबळे हे वारसदार तर वारसा नसलेले युवा उमेदवार अतुल वांदिले असे चौघेही घरी बसले आहे. मयुरा अमर काळे यांचा पराभव तर घराणेशाहीचे उबग आणणारे उदाहरण ठरले होते. त्याचे बेधडक समर्थन करणारे खासदार अमर काळे हे दिवं. माजी मंत्री शरद काळे यांचे चिरंजीव. सुप्रिया सुळे सांगून गेल्या की मयुरा माझ्या नात्यात तर राष्ट्रवादीचे नेते अनिल देशमुख यांचे अमर काळे यांचे मामा. त्याच नात्याचा दबाव आणत तिकीट आणायची व मतदारांना भावनिक साद घालायची, असे राजकारण आर्वीतून मतदारांनी नापसंद केले आहे.
देवळीत माजी मंत्री दिवं. प्रभा राव यांचे भाचे असलेले रणजित कांबळे हे दरवेळी निवडून येतातच कसे, असा राजकीय वर्तुळस नेहमी पडणारा प्रश्न. अरेरावी व उद्दामपणा याचे प्रतीक म्हणून कांबळे यांच्यावर टीका व्हायची. ती खऱी असल्याचे मतदार सांगते झाले आहे. वर्ध्यात शेखर शेंडे हे माजी मंत्री दिवं. विधानसभा उपाध्यक्ष प्रमोदबाबू शेंडे यांचे सुपुत्र. राजकीय वारसा त्यांनी मिळविला. पण चौथ्यांदा यशाने पाठ फिरविली. त्यांचे आजोबा भाऊसाहेब शेंडे हे पण आमदार राहून चुकले. परिघातील तेली समाजाचं नेतृत्व त्यांच्याकडे. मात्र अधिकचे सर्व सामाजिक संबंध पण त्यांनी जुळविले. पण हे नकोच, असा निरोप मतदारांनी त्यांना दिला आहे.
हेही वाचा >>> Gadchiroli Election Result 2024 : धर्मरावबाबांनी अहेरीचा गड राखला, गडचिरोलीत भाजपचे वर्चस्व; आरमोरीत काँग्रेसची मुसंडी
लोकसभा निवडणुकीत अमर काळे यांना आघाडीने उमेदवार म्हणून पसंती दिली. लाटेत ते निवडून आलेही. पण पुढील काळात व आता निवडणुकीत त्यांना पत्नीसाठीच राजकीय धावाधाव करावी लागल्याने आघाडीच्या एकाही उमेदवारासाठी ते प्रचार करू शकले नाही. आता मतदारांनी त्यांना पुढे कुटुंबासाठीच वेळ देण्याचा सल्ला मतदानतून देऊन टाकला. तीन राजकीय घराण्यापुढे आता पुढे काय, हा प्रश्न मतदारांनी निर्माण करून ठेवला आहे. भाजपचे चारही विजयी उमेदवार हे राजकीय वारसा शून्य असलेले तर काँग्रेसचे तीन दमदार राजकीय वारसा सांगणारे. जिल्ह्याच्या पुढील राजकारणात काँग्रेसला सूचक संदेश देणारे हे मतदान ठरले असल्याची चर्चा सूरू झाली आहे.
© The Indian Express (P) Ltd