महाविकास आघाडी, युवा ग्रॅज्युएट दोन जागांवर विजयी; नागपूर विद्यापीठ अधिसभा निवडणुकीत मतविभाजनाचा फटका

हेही वाचा >>>भंडारा : धक्कादायक! सिरेगावटोला येथील अख्खे आदिवासी कुटुंब १६ दिवसांपासून बेपत्ता

राखीव प्रवर्गातील जागांचा निकाल पहिल्याच दिवशी जाहीर झाला असला तरी खुल्या वर्गाची मतमोजणी गुरुवारी पहाटे पाच वाजतापर्यंत चालली. नोंदणीकृत पदवीधर मतदारसंघाच्या खुल्या प्रवर्गातील ५ जागांकरिता एकूण १३,९४९ मतदारांनी मतदान केले. यात १२,२५४ मते वैध तर १६९५ मते अवैध ठरली. या पाच जागांकरिता २०४३ मतांचा कोटा निश्चित करण्यात आला होता. पहिल्या फेरीअखेर कोणत्याच उमेदवाराने निश्चित मतांचा कोटा पूर्ण केला नाही. त्यामुळे पहिल्या फेरीनंतर बाद फेरीस सुरुवात करण्यात आली. बाद झालेल्या १९ उमेदवारांना मिळालेली अन्य पसंती क्रमाच्या मतांची फेरी निहाय मोजणी करण्यात आली. त्यानंतर सर्वाधिक मते घेणाऱ्या अनुक्रमे पाच उमेदवारांना विजयी घोषित करण्यात आले.

खुल्या प्रवर्गातून एकूण २५ उमेदवारांपैकी ॲड. मनमोहन वाजपेयी हे २०७४ मते, विष्णू चांगदे हे २०१६ मते, मनिष वंजारी १९६२ मते, राहुल हनवटे १५४६ मते तर अजय चव्हाण १४६६ मते घेऊन विजयी ठरले. मतमोजणी निवडणूक निर्णय अधिकारी डॉ. राजू हिवसे यांच्या मार्गदर्शनाखाली त्रिसदस्यीय समितीमधील सदस्य डॉ. शामराव कोरेटी, डॉ. रवीन जुगादे, डॉ. रूपेश बडेरे, सहाय्यक निवडणूक निर्णय अधिकारी तथा उपकुलसचिव प्रदीप बिनीवाले, उपकुलसचिव डॉ. राजेंद्र उतखेडे, विशेष कार्य अधिकारी वसीम अहमद यांच्या नेतृत्वात पार पडली. यावेळी मेहताब खान, संजय भोयर, गणेश कुमकुमवार, शैलेश राठोड, मनीष झोडपे, प्रवीण गोतमारे, सलीम शाह, स्वप्निल मोडक, नितीन खरबडे यांच्यासह अन्य कर्मचाऱ्यांनी सहकार्य केले.

हेही वाचा >>>“ऑस्करसाठी निवड होणे म्हणजे सर्वश्रेष्ठ चित्रपट असे होत नाही”, नागराज मंजुळेंनी व्यक्त केले मत

ॲड. वाजपेयी चौथ्यांदा अधिसभेवर
काँग्रेस नेते गिरीश पांडव यांच्या विद्यार्थी संग्राम परिषदेच्या माध्यमातून महाविकास आघाडीमध्ये सहभागी झालेले ॲड. मनमोहन वाजपेयी चौथ्यांदा अधिसभेवर पदवीधर गटातून निवडून आले. या निवडणुकीत महाविकास आघाडीच्या गटाचा पराभव झाला असला तरी पांडव यांचे उमेदवार विजयी झाल्याने त्यांचे वर्चस्व कायम आहे. ॲड. वाजपेयी यांची विजयी रॅली काढण्यात आली. यावेळी पांडव स्वत: उपस्थित होते.

हेही वाचा >>>चंद्रपूर: नगरोत्थान निधी वाटपावरून भाजपात घमासान, नगरसेवक नाराज

युवा ग्रॅज्युएट पहिल्याच प्रयत्नात यश
अधिसभेच्या निवडणुकीमध्ये पहिल्यांदाच उतरलेल्या अतुल खोब्रागडे यांच्या युवा ग्रॅज्युएट फोरमने एका जागेवर विजय मिळवला. इतर जागांवर ते पराभूत झाले असले तरी त्यांच्या उमेदवारांना मिळालेली मते ही महाविकास आघाडीच्या उमेदवारांच्या बरोबरीची होती. त्यामुळे यंदाची निवडणूक त्रिशंकू ठरली.

समविचारी संघटना वेगवेगळ्या लढल्याने मतविभागजनाचा फटका आम्हाला बसला. एका बाजूला अभाविप तर एका बाजूला अन्य चार उमेदवार असे चित्र होते. त्यामुळे मतांचे मोठ्या प्रमाणावर विभाजन झाले. भविष्यात यावर सर्वांनी चिंतन करण्याची गरज आहे. – डॉ. बबनराव तायवाडे, काँग्रेस नेते.