केंद्रीय मंत्री, उपमुख्यमंत्री आणि भाजपचे प्रदेशाध्यक्ष असलेल्या गृह जिल्ह्यात पंचायत समिती सभापती, उपसभापतीच्या निवडणुकीत काँग्रेसने मुसंडी मारली असून भाजपला मोठा धक्का बसला आहे. प्रतिष्ठेच्या लढतीत नागपूर जिल्ह्यातील तेरा पंचायत समितीचे सभापती व उपसभापती निवडणूकीत काँग्रेसचे ९ ठिकाणी तर राष्ट्रवादी काँग्रेसचे ३ ठिकाणी सभापती निवडून आले असून काँग्रेसने जोरदार मुसंडी मारली आहे.
नागपूर जिल्ह्यात १३ पंचायत समितीमध्ये सभापती व उपसभापतीची निवडणूक होती. त्यात तेरा तालुक्यांमध्ये भाजपाचा कुठल्याही पंचायत समितीत सभापती होऊ शकला नाही. केवळ दोन तालुक्यात उपसभापती पदावर भाजपाला समाधान मानावे लागले आहे.
हेही वाचा- बुलढाणा : विदर्भातील काँग्रेसच्या ११ नेत्यांवर ‘भारत जोडो’ची विशेष जवाबदारी
मिळालेल्या माहितीनुसार १३ पंचायत समितीच्या निकाला पैकी काँग्रेस ९, राष्ट्रवादी काँग्रेस ३, शिवसेना १ जागेवर विजयी झाले आहे. नागपूर जिल्ह्यातील काँग्रेस- उमरेड, कुही, भिवापूर, कामठी, मौदा, पारशिवनी, सावनेर, कळमेश्वर, नागपूर (ग्रामिण), राष्ट्रवादी काँग्रेस – हिंगणा, काटोल, नरखेड, रामटेक – सेना या तालुक्यात पंचायत समितीच्या सभापती व उपसभापती निवडणूका पार पडल्या. माजी मंत्री सुनील केदार यांच्या नेतृत्वात व नागपूर जिल्ह्याचे अध्यक्ष राजेंद्र मुळक यांच्या अध्यक्षतेखाली काँग्रेसने यश मिळविले. नागपूर जिल्ह्यातील सहाही विधानसभा मतदार संघात विजयी झालेल्या पंचायत समितीचे सभापती व उपसभापती यांचे राजेंद्र मुळक यांनी अभिनंदन केले आहे.
