सव्वा तीन हजार ग्राहकांवर कोसळली कारवाईची ‘वीज’; वाचा नेमकं प्रकरण काय?; २६४ कोटींच्या वसुलीसाठी ‘बत्तीगुल’

परिमंडळांतर्गत विविध वर्गवारीतील सुमारे १५ लाख ग्राहकांना वीज पुरवठा केला जातो. फेब्रुवारी अखेर कृषी ग्राहक, पाणी पुरवठा व पथदिव्याचे ग्राहक वगळून परिमंडळातील घरगुती, वाणिज्यिक, औद्योगिक आणि इतर वर्गवारीतील वीज ग्राहकांकडे २६४ कोटी रुपये वीज देयकाचे थकले आहेत. त्यामुळे महावितरणपुढे आर्थिक अडचण निर्माण झाली. थकबाकीचा आकडा फुगल्याने महावितरणने वीज देयक वसुली मोहीम अधिक तीव्र केली. परिमंडळांतर्गत पुढील १८ दिवसात कराव्या लागणाऱ्या एकूण २६४ कोटी रुपयाच्या थकीत वीज देयकामध्ये अकोला जिल्हा ८८ कोटी ४७, बुलढाणा १२९ कोटी ३३ लाख आणि वाशीम जिल्ह्यातील ४६ कोटी ५५ लाख रुपयांची वसूल होणे अपेक्षित आहे. मार्च महिन्याच्या १३ दिवसात केवळ ५८ कोटी रुपये वसूल झाले. त्यामुळे ३२२ कोटी थकबाकीची रक्कम कमी होऊन २६४ कोटी झाली. महावितरणच्या वीज देयक भरण्याला प्रतिसाद दिला नसल्याने मार्च महिन्याच्या पहिल्या १२ दिवसात परिमंडळातील तीन हजार २८३ ग्राहकाचा वीज पुरवठा खंडित केला आहे. यामध्ये अकोला जिल्ह्यातील एक हजार १३६‚बुलढाणा एक हजार ५४७ आणि वाशीम जिल्ह्यातील ६०० ग्राहकाचा समावेश आहे. आता कारवाई करण्याचे निर्देश स्पष्ट असल्याने कारवाईचा आकडा मोठ्या प्रमाणात वाढणार असल्याची माहिती परिमंडळाचे मुख्य अभियंता राजेश नाईक यांनी दिली.

पुनर्जोडणी शुल्काचा आर्थिक भुर्दंड वीज ग्राहकांनी वेळेत वीज देयक भरणे आवश्यक आहे. महावितरणची कारवाई झाल्यानंतर संबंधित ग्राहकांचा वीज पुरवठा खंडित केल्याची नोंद महावितरणच्या ऑनलाइन प्रणालीत करावी लागते. त्यामुळे सिंगल फेज ग्राहकांना ३१० रुपये व  जीएसटी आणि थ्री फेज ग्राहकांना ५२० रुपये व जीएसटी पुनर्जोडणी शुल्क भरावेच लागणार आहेत. त्यामुळे ग्राहकांना मनस्ताप,आर्थिक दंड आणि वेळेचा अपव्यय टाळण्यासाठी वीज ग्राहकांनी वेळेत वीज देयक भरण्याचे आवाहन महावितरणने केले.