अमरावती : एका महिलेला अंघोळ करताना चोरून पाहणाऱ्या आरोपीला पकडून चांगलाच चोप देण्यात आला. त्याला पकडून पोलिसांच्या स्वाधिन करण्यात आले. गाडगेनगर पोलीस ठाण्याच्या हद्दीत हा प्रकार घडला. याप्रकरणी एका विवाहितेच्या तक्रारीवरून पोलिसांनी आरोपी मोहम्मद नाजीस अब्दुल कय्युब याच्याविरूध्द विनयभंगाचा गुन्हा दाखल केला.
हेही वाचा >>> नागपूर : प्रेमाचा त्रिकोण; प्रियकराचा खून करण्याचा प्रयत्न
एक विवाहिता घरातील बाथरूममध्ये आंघोळ करीत होती. दरम्यान २५ वर्षे वयोगटातील एक तरूण बाथरूमचा पडदा उघडून आपल्याला पाहत असल्याचे महिलेच्या लक्षात आले. त्यामुळे तिने पतीला आवाज दिला. आरडाओरडीदरम्यान तो पळून गेला. मात्र महिलेने पतीच्या दुचाकीवर बसून लगेच आरोपीचा पाठलाग सुरू केला. गाडगेनगरकडे पळून जात असताना महिलेच्या पतीने त्याला पकडले. त्यावेळी परिसरातील नागरिक देखील गोळा झाले. पैकी काहींनी त्याला चांगला चोप देखील दिला. त्याला नाव विचारण्यात आले. घटनेची माहिती गाडगेनगर पोलिसांना माहिती देण्यात आली. दरम्यान आरोपी मो. नाजीस हा त्या भागात महिनाभरापासून चकरा मारत असल्याचे काही प्रत्यक्षदर्शींने सांगितले. आरोपीच्या विरोधात विनयभंगाचा गुन्हा दाखल करण्यात आला आहे.
