लोकसत्‍ता टीम
अमरावती : बडनेरा रेल्‍वे स्‍थानकापासून जवळच असलेल्‍या एका हॉटेलनजीक २७ वर्षीय तरूणाची धारदार शस्‍त्राने वार करून हत्‍या करण्‍यात आली. ही हत्‍या मृत तरूणाच्‍या दोन मित्रांनीच केल्‍याचे समोर आले. पोलिसांनी आरोपींच्‍या विरोधात हत्‍येचा गुन्‍हा दाखल केला आहे. ही घटना शुक्रवारी रात्री घडली.
विक्रम पप्‍पू संगते (२७, रा. तिलकनगर, जुनी वस्‍ती, बडनेरा) असे मृताचे नाव आहे. या प्रकरणात आयुष नरेश मेश्राम (रा. प्रभात कॉलनी, बडनेरा) आणि लौकेश वीरेंद्र चौधरी (रा. गांधीनगर, बडनेरा) या आरोपींच्‍या विरोधात गुन्‍हा नोंदविण्‍यात आला आहे.
आणखी वाचा-करोनाचे निदान झालेला रुग्ण नागपूरहून विमानाने…
मारेकरी आयुष आणि लौकेश हे विक्रमचे मित्र आहेत. एक महिन्‍यापुर्वी विक्रम आणि त्‍यांच्‍यात वाद झाला होता. हा वाद होण्‍यापुर्वी तिघेही सोबतच राहत होते. त्‍यांच्‍यात नंतर दुरावा निर्माण झाला होता. महिनाभरापुर्वी झालेल्‍या वादाचा वचपा काढण्‍यासाठी आरोपींनी विक्रमला बडनेरा रेल्‍वेस्‍थानका समोरील एका हॉटेल जवळ नेऊन त्‍याच्‍यावर चाकूने वार केले. या हल्‍ल्‍यात विक्रमचा घटनास्‍थळीच मृत्‍यू झाला. घटनेची माहिती मिळताच बडनेरा पोलिसांचे पथक घटनास्‍थळी पोहचले. पोलीस मारेकऱ्यांचा शोध घेत आहेत.
