पत्नीकडे वाईट नजरेने का पाहतोस, अशी विचारणा करून एका तरूणाची कोयत्याने वार करून हत्‍या करण्यात आल्‍याची घटना नांदगाव खंडेश्वर पोलीस ठाण्‍याच्‍या हद्दीत उघडकीस आली आहे. नांदगाव खंडेश्वर ते मोखड मार्गावरील मालानी गिट्टी खदानच्या प्रवेशद्वारा जवळ आकाश गजानन सहारे (२५, रा. सावनेर) याचा मृतदेह शनिवारी आढळून आला होता. गजाननची हत्‍या करण्यात आल्याचे स्पष्ट झाले आहे.
हेही वाचा >>> वाशीम : फडणवीस आणि ठाकरेंनी एकत्र यावे, महंत कबीरदास महाराज यांची इच्छा
याप्रकरणी नांदगाव खंडेश्वर पोलिसांनी मृत गजाननचा भाऊ महादेव सहारे (३१, रा.सावनेर) याच्या तक्रारीवरून अंकुश दामोदर हंबर्डे (३३, सावनेर ता. नांदगाव खंडेश्वर) याच्याविरुद्ध हत्‍येचा गुन्हा दाखल केला. अवघ्या काही तासात खुनाचा गुन्हा उघड करण्यात पोलिसांना यश आले. आरोपी अंकुश हंबर्डे याला अटक करण्यात आली. त्याला रविवारी न्यायालयात हजर करण्यात आले. तू माझ्या पत्नीकडे वाईट नजरेने का पाहतो, अशी विचारणा केल्‍यानंतर झालेल्या वादातून अंकुशने आपल्या भावाला कोयत्याने मारून जिवानिशी ठार केल्याची तक्रार मृताचा भाऊ महादेवने नोंदविली. शनिवारी दुपारी आकाशचा मृतदेह चार किमी अंतरावरील खदानीसमोर आढळून आला होता. नांदगाव खंडेश्वर पोलिसांनी पंचनामा करत तातडीने मृताची ओळख पटविली. यापूर्वी देखील आकाश सहारे व अंकुश हंबर्डे यांच्यात वाद झाला होता, असे तपासादरम्यान उघड झाले आहे.
