नागपूर : छत्तीसगड येथील बालोद येथे भाचीच्या लग्नात मामा बेभान होऊन नाचत होता. नाचतानाच त्याला अचानक हृदयविकाराचा झटका आल्याने त्याचा मृत्यू झाला. हा व्हिडीओ समाजमाध्यमांवर व्हायरल झाला आहे.
छत्तीसगड येथील भिलाई स्टील प्लांटच्या बालोद येथील दल्ली राजरा खाणीत दिलीप राऊतकर हे अभियंता म्हणून कार्यरत आहे. ४ मे रोजी त्यांच्या भाचीचे लग्न दल्ली राजरा येथे संपन्न झाले. या लग्नाचे सेलिब्रेशन रात्री १२ वाजतापर्यंत सुरू होते. सेलिब्रेशनदरम्यान वर-वधू दोघेही स्टेजवर नाचत होते. दोघांना नाचताना बघत उत्साहात दिलीप राऊतकरही नाचायला स्टेजवर गेले. तेही आनंदाच्या भरात बेभान होऊन नाचू लागले.
हेही वाचा – नागपूरमार्गे धावणाऱ्या सात रेल्वेगाड्यांना विलंब
नाचताना अचानक त्यांच्या हृदयात वेदना सुरू झाल्या. त्यामुळे ते खाली बसले. त्यानंतर काही सेकंदातच ते स्टेजवर झोपले. अचानक दिलीपला झोपलेले पाहून सर्व वऱ्हाडी तेथे धावले. तातडीने त्यांना जवळच्या रुग्णालयात हलवण्यात आले. परंतु, त्यांचा आधीच मृत्यू झाल्याचे घोषित करण्यात आले.
