अमरावती : अमरावतीत शहर पोलिसांच्या गुन्हे शाखेने ३०० ग्रॅम मेफिड्रोन (एमडी) घेऊन शहरात येणाऱ्या तिघांना अटक केली. त्यांच्याकडून एमडी, मोबाइलसह एकूण १२ लाख ९२ हजारांचा मुद्देमाल जप्त केला. विशेष म्हणजे, पोलिसांनी मुंबईतील पुरवठादारालाही बेड्या ठोकल्या आहेत.
खलिदोद्दीन झामोरीद्दीन (रा. माना, ता. मूर्तिजापूर), अश्फाक अशरफ शेख (नौपाडा, बांद्रा, मुंबई) आणि शोएब अहमद शेख हसन (रा. चांदणी चौक, अमरावती) अशी अटक केलेल्या आरोपींची नावे आहेत. खलिदोद्दीन झामोरीद्दीन व अन्य दोघे अमरावती ते नांदगाव पेठ मार्गावरील हॉटेल मेजवानीजवळ ‘एमडी’ या अमली पदार्थाच्‍या विक्रीबाबत व्यवहार करत असल्याची माहिती गुन्हे शाखेला मिळाली होती. याआधारे पोलिसांनी तिघांवर कारवाई केली. एवढ्या मोठ्या प्रमाणात ‘एमडी’ हस्‍तगत करण्‍याची शहर पोलिसांची ही अलीकडच्‍या काळातील सर्वात मोठी कारवाई ठरली आहे.
हेही वाचा – खळबळजनक! देशात जानेवारी व फेब्रुवारीत एकूण ३४ वाघांचा मृत्यू
पोलीस आयुक्‍त नवीनचंद्र रेड्डी यांनी शहरामध्‍ये होणाऱ्या एमडी विक्रीच्‍या अनुषंगाने पुरवठादारांवर कारवाई करण्‍याचे निर्देश दिले होते. याबाबत त्‍यांनी गुन्हे शाखेला मार्गदर्शनदेखील केले होते. एमडी शहरात कुठून येते, त्‍याचा पुरवठादार कोण, स्‍थानिक वितरक कोण, याची माहिती काढण्‍यासाठी सायबर विभागाची मदत घेण्‍यात आली. ठोस माहिती हाती लागताच सापळा रचण्‍यात आला.
