नागपूर : आंतरराष्ट्रीय महिला दिनानिमित्ताने महामेट्रोने महिलांना ५०० रुपयाच्या टॉप-अपवर २० रुपयात ‘महाकार्ड’ देण्याचा निर्णय घेतला आहे. त्यामुळे महिलांना आता स्वस्तात मेट्रोने प्रवास करता येणार आहे. आंतरराष्ट्रीय महिला दिवस दरवर्षी ८ मार्च रोजी साजरा केला जात असून या विशेष दिवसासाठी महामेट्रोच्या वतीने आठवडाभर महिलांना ही संधी उपलब्ध असेल. ही संधी उद्या दिनांक १ मार्चपासून सुरु होणार असून ८ मार्चपर्यंत सुरु राहील. ‘महाकार्ड’ हे भारतीय स्टेट बँकसोबत सहकार्याने सुरू करण्यात आले आहे. आतापर्यंत १,०४,८१६ कार्ड विकल्या गेले आहेत. ‘महाकार्ड’ मेट्रो भाड्यांवर १० टक्के सवलत प्रदान करते.
प्रवाशांचा प्रवास सुखकर व्हावा तसेच आरोग्याचा विचार करता स्पर्शविहीन व्यवस्थापनाकरिता महामेट्रोने स्मार्ट कार्ड आधारित ओपन लूप ऑटोमॅटिक फेअर कलेक्शन प्रणाली स्वीकारली आहे आणि ही नागपुरातील सर्व मेट्रो स्थानकांवर लागू करण्यात आली आहे. या प्रणालीच्या माध्यमातून प्रवासी महा कार्डचा उपयोग करून कॅशलेस आणि विनास्पर्श, तसेच सवलतींवर सहज सुलभ प्रवास करू शकतात.
या प्रणालीच्या माध्यमाने प्रवाशांना ट्रेनमध्ये चढताना आणि उतरताना मेट्रो स्टेशनवरील ऑटोमॅटिक फेअर कलेक्शन (एएफसी) गेट्सवर फक्त त्यांचे महा कार्ड टॅप करावे लागते आणि त्या माध्यमाने प्रवासी भाडे कार्डमधून कापल्या जाते. महा कार्ड आणि अत्याधुनिक एएफसी प्रणाली पूर्णपणे सुरक्षित आणि पारदर्शक असून जेवढा प्रवास केला असेल तेवढेच भाडे कार्ड मधून वजा केले जाते. ईएमव्ही आधारित स्मार्ट कार्ड ओरिएंटेड ऑटोमॅटिक फेअर कलेक्शन सिस्टीम हे प्रवास भाडे भरण्यासाठी उत्तम उपाय आहे.
महामेट्रोने आजपर्यंत प्रवाशांच्या दृष्टीने अनेक सोयी-सुविधा उपलब्ध करून दिल्या आहेत. त्यात विशेषत्वाने विद्यार्थ्यांसाठी तिकीट दरात ३० टक्के सवलत, शनिवार आणि रविवार या दोन दिवशी ‘वीकएंड’ सवलत, दैनिक पास फक्त १००रुपयात आणि महाकार्डने प्रवास केल्यास प्रत्येक प्रवासावर १० टक्के सवलत उपलब्ध करून देण्यात आल्या आहेत. त्यात विद्यार्थ्यांसाठी देण्यात येणाऱ्या ३० टक्के सवलतींमुळे विद्यार्थ्यांमध्ये मेट्रो प्रवास जास्त लोकप्रिय झाला आहे.
महा कार्ड आणि एएफसी प्रणालीमुळे मेट्रोने प्रवास करणे सोपे आणि स्वस्त तर झाले आहेच पण या सोबतच कार्डच्या वापरामुळे कागदांची बचत करण्यास मदत होते आणि कचरा टाळला जातो यादृष्टीने ते पर्यावरण पूरक देखील आहे. मेट्रो स्थानकांवर महा कार्डची खरेदी तसेच टॉपअप करता येते.
