प्रशांत देशमुख
वर्धा : शहराला नवे पर्यटनस्थळ मिळण्याची चिन्हे आहेत.शहरालगत सालोड येथे वन विभागाचे अठरा हेक्टरचे वन क्षेत्र उपलब्ध आहे. याच जागेवर ‘इको टुरिझम पार्क’ उभारण्याचा प्रयत्न आमदार डॉ पंकज भोयर यांच्याकडून सुरू झाला आहे. वनमंत्री सुधीर मुनगंटीवार यांना त्यांनी विनंती केली होती.त्यावर तात्काळ सकारात्मक भूमिका घेत वनमंत्र्यांनी याबाबत प्रस्ताव सादर करण्याची सूचना खात्याच्या सचिवास केली.
मेघे अभिमत विद्यापीठाच्या जवळ व राष्ट्रीय महामार्गालगत मोक्याच्या या जागेवर पार्क झाल्यास नागरिकांसाठी विरंगुळ्याचे ते चांगले ठिकाण ठरेल.तसेच या निमित्ताने बेरोजगारांना रोजगाराच्या अनेक संधी उपलब्ध होतील,असा विश्वास आ.भोयर यांनी लोकसत्ताशी बोलतांना व्यक्त केला.पार्कसाठी २१ कोटी रुपयांचा खर्च अपेक्षित आहे.
वर्धा जिल्हा सेवाग्राम, पवनार, बोर अभयारण्य व अन्य स्थळांमुळे जिल्हा पर्यटकांसाठी आकर्षणाचे केंद्र आहे.हा इको पार्क त्यात भर घालणारा ठरेल.अर्थमंत्री असतांना मुनगंटीवार यांनी भोयर यांच्या विनंतीवरून विविध कामांसाठी भरघोस निधी उपलब्ध करून दिला होता. त्यामुळे हा प्रस्ताव देखील लगेच मान्य होण्याची शक्यता व्यक्त केली जात आहे.
