बुलढाण्यात तब्बल पावणेसात लाख मतदारांची मतदानाकडे पाठ; प्रशासन व उमेदवारांचे प्रयत्न व्यर्थ

यंदा आयोगाच्या मार्गदर्शनात जिल्हा प्रशासन व निवडणूक विभागाने दीडेक महिन्यापासून सतत विविध उपक्रम राबविले. यातून मतदारसंघाच्या कानाकोपऱ्यात मतदान जागृती करण्यात आली. यात स्वयंसेवी संस्था, सामाजिक संघटना यांनीही हातभार लावला. यामुळे जिल्हाधिकारी किरण पाटील यांनी यंदा ७० टक्के मतदानाची शक्यता वर्तविली होती. निवडणूक रिंगणात तब्बल २१ उमेदवार होते. महायुतीचे प्रतापराव जाधव यांनी झंझावती प्रचार करून मोठ्या संख्येने प्रचारसभा लावल्या. महाविकास आघाडीचे उमेदवार नरेंद्र खेडेकर यांच्यासह अपक्ष रविकांत तुपकर, संदीप शेळके या उमेदवारांनीही ‘रोड शो’, प्रचारफेऱ्या काढून वातावरण निर्मिती केली. वंचित, बसपा यांसह इतर अपक्षांनी आपापल्या परीने प्रचार केला. मतदारसंघात हजारो प्रचाररथ, ध्वनिवर्धक, फलक, याद्वारे प्रचार करण्यात आला. समाजमाध्यमे तर निवडणुकांनी व्यापून गेल्याचे दिसून आले.

हेही वाचा…मतदान न करताच ५०० रुपये देऊन बोटाला शाई लावली, भाजप कार्यकर्त्यांनी आरोपीला पळवले…महाविकास आघाडीचा उमेदवार संतापला….

सामूहिक रोष?

रिंगणात युती, आघाडी, दोन तगडे अपक्ष, वंचित, असे पर्याय होते. अपक्षांची भरमार होती. खासदारांविरुद्ध काहीसा रोष असला तरी मतदारांना अन्य पर्यायही होते. याउप्परही सगळ्यांना नापसंत करून रोष व्यक्त करायचा तर ‘नोटा’च्या रुपाने बाविसावा पर्याय देखील होता. असे असतानाही ६ लाख ७६ हजार ९३९ मतदारांनी पवित्र हक्क बजावण्याचे टाळणे, ही धक्कादायक बाबच ठरावी.

हेही वाचा…मतदान न करणाऱ्यांविरोधात नागपुरात संताप…..

विधानसभानिहाय नाकर्ते मतदार

बुलढाणा विधानसभा मतदारसंघात २९३४४९ पैकी १,३५ ११८ मतदारांनी मतदान करण्याचे टाळले. सुशिक्षित, नोकरदार वर्गाचा, जिल्हा मुख्यालय केंद्रबिंदू असलेला हा मतदारसंघ आहे. याशिवाय, चिखली ११०१८९, सिंदखेडराजा १२१४३०, मेहकर १०५१५५, जळगाव १०७२२७ आणि खामगावातील ९७८२० मतदारांनी मतदानाकडे पाठ फिरवली.