एकनाथ शिंदेंना धमकी : मुंबई पोलीस रात्रीच बुलढाण्यात धडकले, अन्…

राज्याचे उपमुख्यमंत्री एकनाथ शिंदे यांचे शासकीय वाहन बॉम्बने उडवून दिले जाईल, अशी धमकी गुरुवारी मुंबई येथील काही पोलीस ठाणे आणि मंत्रालयाला ‘ईमेल’द्वारे प्राप्त झाली होती. यानंतर लगेच मुंबई पोलीस, दहशतवाद विरोधी पथक (एटीएस) सतर्क होऊन ‘अॅक्शन मोड’वर आले. गुरुवारी रात्री प्राप्त गोपनीय माहितीच्या आधारे गुन्हे शाखेचे सहाय्यक पोलीस निरीक्षक विजय रासकर  व देऊळगाव राजा पोलीस ठाण्याचे वरिष्ठ पोलीस निरीक्षक संतोष महल्ले, सहाय्यक पोलीस निरीक्षक हेमंत शिंदे व मुंबई एटीएस पथक देऊळगाव मही (ता. देऊळगाव राजा, जि. बुलढाणा ) येथे धडकले. दरम्यान धमकीच्या ‘ई-मेल आयडी अॅड्रेस’वरून अभय शिंगणे वय २५ व मंगेश वायाळ यांना देऊळगाव महीमधून ताब्यात घेण्यात आले. दोघा आरोपींना एटीएस पथकाने अटक करून मुंबई येथे नेले.

किरकोळ उद्योग करणाऱ्याचा ‘मोठा उद्योग’

एटीएस पथकाने अटक केलेल्या अभय शिंगणे याचे देऊळगाव मही येथे मुख्य रस्त्यावर मोबाईल दुरुस्तीचे  दुकान असून मंगेश वायाळ हा मालवाहक वाहनाचा (ट्रकचा ) चालक आहे. ई-मेलद्वारे धमकी देणाऱ्या आरोपींची पार्श्वभूमी तपासल्यानंतरच धमकी देण्याचे कारण उघडकीस येणार आहे. मुंबई हादरवून देणाऱ्या या धमकीचे देऊळगाव मही ‘कनेक्शन’ उघडकीस आल्याने तालुका व परिसरात एकच खळबळ उडाली आहे.

मोबाईलवरून पाठविलेला पहिलाच मेल

अटक करण्यात आलेले दोन्ही आरोपी नातेवाईक असून मामेभाऊ आत्या भाऊ असल्यावर चौकशीत शिक्कामोर्तब झाले आहे. मंगेश वायाळ याने अभयच्या दुकानात मोबाईल चार्जिंगला लावला होता. तेथूनच धमकीचे ई-मेल पाठविण्यात आल्याचे अतिप्राथमिक चौकशीत निष्पन्न झाले. विशेष म्हणजे, मंगेशच्या ‘आयडी’वरून पाठविण्यात आलेले हा पहिलाच ई-मेल आहे. शिवाय यातील मंगेश वायाळ हा अल्पशिक्षित तर अभय शिंगणे हा जेमतेम बारावी उत्तीर्ण आहे.

गुन्हा दाखल

याप्रकरणी गोरेगाव पोलीस ठाण्यात भारतीय न्याय संहिता अंतर्गत कलम 351(3), 351(4) आणि 353 (2) नुसार गुन्हा दाखल करण्यात आला होता. या कलमांनुसार, कोणत्याही सरकारी अधिकाऱ्यास किंवा महत्त्वाच्या व्यक्तीला धमकी देणे हा गंभीर गुन्हा मानला जातो आणि त्यासाठी कठोर शिक्षेची तरतूद आहे.

मास्टरमाईंड शोधा : शशिकांत खेडेकर

सिंदखेड राजा मतदारसंघांचे माजी आमदार डॉ. शशिकांत खेडेकर (शिंदे गट) यांनी घटनेची सखोल चौकशी करण्याची मागणी केली आहे. त्यांनी सांगितले की, मुख्यमंत्री असताना एकनाथ शिंदे यांनी महाराष्ट्राचा वेगवान विकास केला.  जनतेसाठी अनेक कल्याणकारी योजना राबविल्या, त्यामुळे विरोधकांच्या पोटात दुखत आहे. अनेक जण नेहमी एकनाथ शिंदे यांना पाण्यात पाहण्याचं काम करतात. या धमकी प्रकरणामागचा खरा ‘मास्टर माईंड’ कोण आहे, याचा पोलिसांनी शोध घेऊन खऱ्या आरोपीवर कडक कारवाई करावी.