नागपूर : दोन मित्रांनी दारू प्यायल्यानंतर एकमेकांशी अनैसर्गिक शारीरिक संबंध प्रस्थापित करण्याचा प्रयत्न केला. मात्र, दुसऱ्याने नकार दिल्यामुळे त्याच्याशी बळजबरी संबंध प्रस्थापित करून डोक्यात दगड घालून खून केला. घनश्याम सिरसाम (शिवनी-मध्यप्रदेश) असे मृताचे नाव आहे. तर संदीप चंद्रभान गोडांगे (२३, खापरी, कोराडी) असे अटकेतील आरोपीचे नाव आहे.
पोलिसांनी दिलेल्या माहितीनुसार, घनश्याम हा खापरी गावातील एका गोठ्यात गायींचे दूध काढण्याच्या कामावर होता. त्याची गावातील संदीपशी मैत्री होती. दोघांनाही दारूचे व्यसन होते. ते दोघेही नेहमी दारू प्यायचे. दोघेही एकमेकांशी अनैसर्गिक संबंध प्रस्थापित करीत होते, अशी माहिती पोलिसांनी दिली.
हेही वाचा >>> अमरावती : ‘त्या’ विहिरीतून निघतेय उकळते पाणी
बुधवारी रात्री दोघांनीही दारू ढोसली. त्यानंतर संदीपने घनश्यामला शारीरिक संबंधासाठी दबाव टाकला. मात्र, त्याने नकार देऊन शिवीगाळ केली. त्यामुळे संदीपने त्याच्यावर अत्याचार करीत त्याचा खून केला. त्याचा नग्नावस्थेत मृतदेह गायीच्या गोठ्यात फेकला. सकाळी हे हत्याकांड उघडकीस आले. याप्रकरणी संदीपला अटक केली असून त्याने गुन्ह्याची कबुली दिली.
