नागपूर : भारतीय जनता पक्षाचे आमदार कृष्णा खोपडे यांची एका ठकबाजाने आर्थिक फसवणूक केली. आरोपीने दिलेल्या खोट्या माहितीवर विश्वास ठेवल्यामुळे खोपडे यांची फसवणूक झाली असून या प्रकरणी लकडगंज पोलिसांनी आरोपी विरुद्ध फसवणुकीचा गुन्हा नोंदविला आहे. प्रवीण कडू (२२) रा. पालघर, तालुका मोकाळा, असे आरापीचे नाव आहे.
२६ एप्रिलच्या रात्री खोपडे हे त्यांचे सहकारी अरुण हारोडे (५०) यांच्यासह दुरंतो रेल्वेने मुंबईला जात होते. या दरम्यान त्यांच्या मोबाईलवर प्रवीणचा फोन आला. त्याने आपले नाव व पत्ता सांगून कुटुंबासह प्रवासादरम्यान त्याच्या वाहनाला ठाणे येथे अपघात झाल्याची माहिती दिली. तसेच या अपघातात तीन जणांचा जागीच मृत्यू झाला असून रुग्णवाहिकाही मिळत नाही व नागपूरला परतण्यासाठी डिझलचे पैसेही नसल्याची बतावणी करीत ६ हजार रुपयांची मागणी केली. आमदार खोपडे यांनी तत्काळ सहकारी हारोडे यांना आरोपी प्रवीणच्या खात्यात ६ हजार रुपये वळते करण्यास सांगितले. अरुण यांनी पैसे वळते केले.
हेही वाचा – जाहिरातीचा तपशील बघायचा असल्यास शुल्क द्या, माहिती व जनसंपर्क महासंचालनालय म्हणते…
हेही वाचा – विदर्भातील गावरान आंबा झालाय दुर्मिळ, लोणच्यासाठी भिस्त ‘या’ राज्यावर
नागपूरला परतल्यावर हारोडे यांनी घटनेबाबत विचारपूस केली असता अशी कुठलीच घटना घडली नसल्याचे स्पष्ट झाले. नंतर त्याच मोबाईल क्रमांकावर संपर्क केला असता प्रवीणने ५ हजार रुपये ऑनलाईन परत केले. मात्र उर्वरित एक हजार रुपये देण्यास टाळाटाळ करू लागला. त्यामुळे हारोडे यांनी पाच दिवसांपूर्वी लकडगंज पोलीस ठाण्यात तक्रार दिली. पोलिसांनी आरोपी विरुद्ध फसवणुकीचा गुन्हा नोंदविला.
