नागपूर : अभियांत्रिकीच्या विद्यार्थिनीवर जामठ्याजवळ कुऱ्हाडीचा धाक दाखवून बलात्कार केल्याच्या गुन्ह्याला आठवडाभराचा कालावधी उलटला तरीही पोलिसांना अद्याप आरोपी गवसला नाही. आरोपीचा सुगावा लागत नसल्यामुळे आरोपीची माहिती देणाऱ्यास ५ लाख रुपयांचे बक्षिस देण्याची घोषणा पोलिसांनी केली आहे. गेल्या ४ ऑक्टोबरला सकाळी दहा वाजता यवतमाळवरून नागपुरात आलेल्या अभियांत्रिकीच्या विद्यार्थिनीला जामठ्याजवळ एका आरोपीने अडविले. तिला कुऱ्हाडीचा धाक दाखवून तिच्यावर बलात्कार केला.
हेही वाचा : जंगलाच्या रक्षणकर्तीचा आंतरराष्ट्रीय व्यासपीठावर सन्मान, “वनदुर्गा” सोहळा
या घटनेनंतर पीडित विद्यार्थिनीच्या माहितीवरून आरोपी युवकाचे रेखाचित्र तयार करण्यात आले होते. आरोपीच्या शोधासाठी पाच पथके नियुक्त करण्यात आले होते. मात्र, ‘स्मार्ट’ असलेल्या नागपूर पोलिसांना अद्याप आरोपी गवसला नाही. सध्या वसुलीत मग्न असलेले गुन्हे शाखेची पथकेही कुचकामी ठरली आहेत. आरोपीचा शोध घेण्यात अपयश येताच आरोपीबाबत माहिती देणाऱ्यास ५ लाखांचे बक्षिस देण्याची घोषणा पोलिसांनी केली. आऊटर रिंग रोडवरील ढाबे आणि हॉटेलमध्ये जाऊन वसुली करण्यासाठी चर्चेत असलेल्या हिंगणा पोलिसांनाही कोणताही सुगावा सापडला नाही.
