प्रशांत देशमुख
वर्धा : काँग्रेस प्रदेशाध्यक्ष नाना पटोले यांची कार्यपद्धती बालिश व हिंदुत्ववादी विचारांना प्रोत्साहन देणारी आहे. त्यांना न बदलल्यास काँग्रेसचे कधीही भरून न निघणारे नुकसान होईल, असा इशारा नाराज काँग्रेस नेत्यांनी दिला आहे. प्रामुख्याने अल्पसंख्याक व मागासवर्गीय नेत्यांनी आपली भावना पक्षाध्यक्ष मल्लिकार्जुन खर्गे यांना चार पानी इंग्रजीतून लिहलेल्या निवेदनातून व्यक्त केली आहे. हे नेते म्हणतात की, पटोले यांची प्रत्येक कृती निष्ठावंत काँग्रेस कार्यकर्त्यांचे मनोबल खच्ची करणारी ठरत आहे.
अल्पसंख्याक मुस्लिम, ख्रिश्चन, तसेच आदिवासी, दलित समाज हा कांग्रेसचा आधार आज नाराज झाला आहे. राज्यातील ४८ पैकी केवळ एकच जिल्हाध्यक्ष अल्पसंख्याक समाजाचा असून विदर्भात तर एकही जिल्हाध्यक्ष, कार्याध्यक्ष किंवा प्रमुख पदावर नाही. भाजपच्या नेत्यांना पटोले संधी देतात. स्थानिक स्वराज्य संस्था तसेच भंडारा व गोंदिया या जिल्हा परिषदेच्या निवडणुकीत हे दिसून आले.
हेही वाचा >>> साहित्य अकादमी नोकरशहा चालवतात!, महेश एलकुंचवार यांचे परखड मत
राजस्थानच्या चिंतन शिबिरात नव्या पण निष्ठावंत चेहऱ्याना संधी देण्याचे ठरले होते. मात्र, राज्यात त्याची अंमलबजावणी नाहीच. राहुल गांधी यांच्या ‘भारत जोडो’ आंदोलनात सहभागी के. के. पांडे यांचे निधन झाल्यावर त्यांच्या कुटुंबियास पंचवीस लाख रुपये देण्याची घोषणा पटोले यांनी केली होती. पण अद्याप देण्यात आली नाही. बाळासाहेब थोरात यांच्यासारख्या ज्येष्ठ नेत्यांना पटोले यांनी नाराज केले. प्रदेश कार्यकारिणीत बदल न झाल्यास आगामी निवडणुकांत काँग्रेसला मोठा फटका बसल्याशिवाय राहणार नाही, असा इशाराही या नेत्यांनी दिला आहे. निवेदनावर प्रकाश मुगदिया, बंडू मल्लेलवार, ऍड माजिद कुरेशी, हर्षवर्धन निकोसे, महेंद्रसिंग सलूजा, आर एम खान नायडू, इकराम हुसेन, रवी शिंदे, मनोज बागडे, विजय बाहेकर, राजेंद्र शर्मा, प्रल्हाद ठाकरे व अन्य आजी माजी प्रदेश व जिल्हा पदाधिकाऱ्यांच्या स्वाक्षऱ्या आहेत.
