लोकसत्ता टीम
नागपूर : पंतप्रधान नरेंद्र मोदी आणि राष्ट्रीय स्वयंसेवक संघ यांचे घनिष्ठ नाते आहे. राजकीय जीवनाला सुरुवात होण्यापूर्वी पंतप्रधान मोदी यांनी पूर्णवेळ प्रचारक म्हणून अनेक वर्ष संघात काम केले आहे. परंतु, पंतप्रधान झाल्याच्या अकरा वर्षात त्यांनी अनेक कार्यक्रम नागपुरात घेतले. यापूर्वी एका कार्यक्रमाला आले असता दीक्षाभूमीही भेट दिली. परंतु राष्ट्रीय स्वयंसेवक संघाच्या मुख्यालयात ते कधीच गेले नव्हते.
३० मार्च रोजी गुढीपाडव्याच्या दिवशी पंतप्रधान नरेंद्र मोदी आणि राष्ट्रीय स्वयंसेवक संघाचे सरसंघचालक डॉ. मोहन भागवत नागपुरात एका कार्यक्रमानिमित्त व्यासपीठावर एकत्र येणार आहेत. या कार्यक्रमापूर्वी पंतप्रधान नरेंद्र मोदी हे रेशीमबागच्या स्मृतिमंदिर येथील डॉ. हेडगेवारांच्या समाधीस्थळाचे दर्शन घेणार आहेत. स्मारक समितीच्या वतीने भैय्याजी जोशी पंतप्रधानांचे स्वागत करणार असल्याचे सांगितले जात आहे. पंतप्रधान नरेंद्र मोदी हे नागपूरच्या संघस्थानी जाणारे पहिले पंतप्रधान ठरणार आहेत. संघाचे हे शताब्दी वर्ष असल्याने मोदींची ही भेट फार महत्वाची ठरणार आहे.
रेशीमबाग येथील संघाच्या स्मृती मंदिर परिसरात संघाचे पाहिले सरसंघचालक डॉ. हेडगेवार आणि द्वितीय सरसंघचालक गोळवलकर गुरुजी यांचे समाधी स्थळ आहे. त्यामुळे हे ठिकाण संघाच्या स्वयंसेवकांसाठी श्रद्धेचे स्थान आहे. पंतप्रधान नरेंद्र मोदी यांनी अनेक वर्ष संघाचे स्वयंसेवक म्हणून काम केले आहे. गुजरातचे मुख्यमंत्री असताना त्यांनी रेशीमबाग येथील स्मृति मंदिर स्थळाला भेट दिली होती. परंतु पंतप्रधान झाल्यावर त्यांनी एकदाही स्मृती मंदिर स्थळाला भेट दिली न्हवती. यावेळी पहिल्यांदाच मोदी रेशीमबाग येथे भेट देणार आहेत.
३० मार्च रोजी गुढीपाडव्याच्या दिवशी पंतप्रधान नरेंद्र मोदी आणि राष्ट्रीय स्वयंसेवक संघाचे सरसंघचालक डॉ. मोहन भागवत नागपुरात एका कार्यक्रमानिमित्त व्यासपीठावर एकत्र येण्याची शक्यता आहे. माधव नेत्रालयाच्या नवीन इमारतीचा भूमिपूजन सोहळा यावेळी होणार आहे. माधव नेत्रालय आय इन्स्टिट्यूट आणि रिसर्च सेंटर हे संघाशी संबंधित आहे. सध्या नेत्रालय वर्धा रोडवर असलेल्या गजानननगरमध्ये सेवा देत आहे. माधव नेत्रालयाची नवीन इमारत हिंगणा रोडवरील वासुदेवनगर मेट्रो स्टेशनजवळ ६.८ एकर परिसरात प्रस्तावित आहे.
या नेत्र संस्थेत रुग्णांना अत्याधुनिक सेवा पुरविल्या जाणार आहेत. गुढीपाडव्याला सकाळी १० वाजता संस्थेतर्फे नवीन इमारतीचा पायाभरणी समारंभ होणार आहे. यासाठी पंतप्रधान नरेंद्र मोदींना निमंत्रित करण्यात आले आहे. पंतप्रधान कार्यालयाने या निमंत्रणाला मान्यता दिल्याचा दावा सूत्रांनी केला आहे. या कार्यक्रमात प्रमुख पाहुणे डॉ. मोहन भागवत असतील. मुख्यमंत्री देवेंद्र फडणवीस, केंद्रीय मंत्री नितीन गडकरी, गोविंदगिरी महाराज, अवधेशानंद गिरी महाराज यांनाही निमंत्रित करण्यात आले आहे.
मोदी-भागवत एका व्यासपीठावर आलेच नव्हते
एका वर्षापूर्वी नागपूरमधील संघाशी संबंधित राष्ट्रीय कॅन्सर इन्स्टिट्यूटच्या लोकार्पण समारंभात पंतप्रधान नरेंद्र मोदी आणि राष्ट्रीय स्वयंसेवक संघाचे सरसंघचालक डॉ. मोहन भागवत यांना एका व्यासपीठावर आणण्याचे प्रयत्न भाजप नेत्यांनी केले होते. पण त्याला यश आले नव्हते. त्यानंतर केंद्रीय गृहमंत्री अमित शहा यांना निमंत्रित करून पुन्हा ‘भागवत-शहा’ यांना एका व्यासपीठावर असा योग जुळवून आणण्याचा प्रयत्न झाला. पण ऐनवेळी शहा यांचाही दौरा अचानक रद्द झाला होता. त्यानंतर आता माधव नेत्रालयाच्या नवीन इमारतीच्या भूमिपूजन सोहळ्यानिमित्त मोदी आणि भागवत एकत्र येणार अशी अपेक्षा व्यक्त केली जात आहे.
