अमरावती : सावित्रीबाई फुले यांच्याबद्दल आक्षेपार्ह लेख लिहिणाऱ्या इंडिक टेल्स वेबसाईट विरोधात गुरुवारी राष्ट्रवादी काँग्रेसच्या वतीने येथील डॉ. बाबासाहेब आंबेडकर चौक परिसरात आंदोलन करण्यात आले. कार्यकर्त्‍यांनी यावेळी निषेध करीत जोरदार घोषणाबाजी केली.
राष्ट्रवादी काँग्रेसचे शहराध्‍यक्ष प्रशांत डवरे यांच्‍या नेतृत्‍वात हे आंदोलन करण्यात आले. सावित्रीबाईंची बदनामी करण्याचा हा प्रकार अतिशय निंदनीय असून अशा अपप्रवृत्तीचा वेळीच बिमोड करणे गरजेचे आहे. असे अपप्रकार अजिबात खपवून घेतल्या जाणार नाही, असा इशारा प्रशांत डवरे यांनी दिला.
या पोर्टलवर इतिहासाची पुनर्मांडणी या नावाखाली अक्षरशः इतिहासाची मोडतोड सुरू आहे. महापुरुषांच्या इतिहासाची मोडतोड करून अपमानजनक लिखाण करणाऱ्या समाजविघातक प्रवृत्तीला वेळीच ठेचण्याची गरज आहे. सावित्रीबाई फुले यांची बदनामी व अनादर याबाबत शासनाने गांभीर्याने दखल घेऊन आक्षेपार्ह लेख लिहिणाऱ्या इंडिक टेल्स या वेबसाईटवर तात्काळ बंदी आणावी आणि अवमानकारक लेख लिहिणारी वेबसाईट तसेच लेखकावर अतिशय कठोर कारवाई करण्यात यावी, अशी मागणी राष्ट्रवादी काँग्रेसच्या वतीने करण्यात आली.
हेही वाचा – “आमच्यावर सरकारचा राग का?”; संतप्त ओबीसींचा नागपूरच्या संविधान चौकात ठिय्या
आंदोलनात अविनाश मार्डीकर, अशोक हजारे, डॉ. गणेश खारकर, ऋतुराज राऊत, आनंद मिश्रा, दिलीप शिरभाते, राजेंद्र टाके, आकाश वडनेरकर, शैलेश अमृते, सचिन खंडारे, शिवपाल ठाकूर, सचिन दळवी, बंडू निंभोरकर, चेतन वाठोडकर, किशोर चव्हाण, भूषण बनसोड, अनंत तेलखडे, संदीप आवारे आदी सहभागी झाले होते.
