नागपूर : १९ एप्रिल रोजी होणाऱ्या लोकसभेच्या निवडणुकीची प्रक्रिया बुधवारपासून सुरू झाली असून अर्ज भरण्याच्या पहिल्या दिवशी नागपूर लोकसभा मतदारसंघात एक अर्ज दाखल झाला. रामटेकसाठी इच्छुकांनी अर्ज खरेदी केले, मात्र कोणीही दाखल केले नाहीत. देशातील महत्त्वाच्या मतदारसंघापैकी एक असलेल्या नागपूर लोकसभा मतदारसंघासाठी अर्ज भरण्याच्या पहिल्या दिवशी ४५ इच्छुकांनी एकूण ८२ अर्ज खरेदी केले. यापैकी एक अर्ज दाखल करण्यात आला. अर्ज दाखल करणाऱ्याचे नाव व्यंकटेश्वर महास्वामी आहे.
हेही वाचा >>> जागा नक्की, पण उमेदवार गुलदस्त्यात! महाविकास आघाडीसह लाखो मतदारातील संभ्रम कायम
रामटेक मतदारसंघासाठी २५ इच्छुकांनी ३१ अर्ज खरेदी केले, यापैकी एकही दाखल झाला नाही. अर्ज दाखल करण्याची शेवटची तारीख २८ मार्च आहे. आतापर्यंत प्रमुख राजकीय पक्षापैकी फक्त भाजपचे नितीन गडकरी यांची उमेदवारी जाहीर झाली आहे. काँग्रेससह अन्य पक्षांकडून त्यांच्या उमेदवाराची घोषणा झाली नाही. अर्ज दाखल करताना उमेदवारासोबत येणाऱ्या कार्यकर्त्यांमुळे जिल्हाधिकारी कार्यालयात होणारी गर्दी टाळण्यासाठी उमेदवारांना तीनपेक्षा अधिक वाहने आणण्यास मनाई करण्यात आली आहे. तसेच निवडणूक निर्णय अधिकाऱ्यांच्या दालनात पाच पेक्षा अधिक लोकांना जाण्यास प्रतिबंध घालण्यात आला आहे.
