धावपट्टीवर श्वान, विमान वळवले भोपाळला

 इंडिगो एअरलाइन्सचे फ्लाइट क्रमांक ५२४३ हे विमान मुंबई येथील छत्रपती शिवाजी महाराज आंतरराष्ट्रीय विमानतळावरून १०.५५ वाजता मुंबईहून नागपूरच्या दिशेने उडाले. येथील डॉ. बाबासाहेब आंबेडकर आंतरराष्ट्रीय विमानतळावर उतरवित असताना धावपट्टीवर श्वान वा श्वानसदृष्य प्राणी असल्याचे वैमानिकाच्या लक्षात आले. विमान उतरविताना श्वानामुळे अपघात होण्याची शक्यता लक्षात घेत वैमानिकाने रात्री १२.३० ते १ वाजतादरम्यान विमान भोपाळला वळविले. दरम्यान, नागपूर विमानतळावरील परिस्थितीचा आढावा घेण्यात आला. श्वान वा इतर कुठल्याही प्राण्यामुळे विमान उतरविताना अडथळा येणार नाही, याची निश्चिती करण्यात आली. त्यानंतर रात्री २.३० वाजता विमान नागपूर येथे परतले. या प्रकारामुळे निर्धारित वेळापत्रकानुसार रात्री १२.३५ वाजता नागपूर येथे पोहचण्याची अपेक्षा बाळगून असलेल्या प्रवाशांना काहीसा विलंब सहन करावा लागला, अशी माहिती सूत्रांनी दिली.