नागपूर दंगलीचा मास्टर माईंड फहीम खान ? अटक

पोलीस सूत्रांनी दिलेल्या माहितीनुसार, विश्व हिंदू परिषद आणि बजरंग दलाच्या कार्यकर्त्यांनीमहाल गांधीगेट परिसरात औरंगजेबाचे छायाचित्र आणि त्याच्या प्रतिकात्मक कबरीचे दहन केले होते. मात्र, त्यावर हिरव्या रंगाची चादर होती. चादरीवर ‘आयत’ लिहिलेली होती. त्यामुळे मायनॉरिटी डेमोक्रॅटीक पार्टीचा अध्यक्ष फईम खान शमीम खान याने काही युवकांना ‘आयत’ असलेली चादर जाळल्यामुळे धार्मिक भावना दुखावल्याचे सांगितले. त्यानंतर फहीम खान याने स्वत: पुढाकार घेऊन गणेशपेठ पोलीस ठाण्यात पोहचला. त्याच्या पाठीमागे जवळपास ४० ते ५० युवकांचा जमाव होता. फहीमने गणेशपेठच्या पोलीस निरीक्षकांना निवेदन दिले आणि चादर जाळणाऱ्यांवर कारवाई करण्याची मागणी केली होती. जोपर्यंत आरोपींविरुद्ध गुन्हे दाखल होऊन त्यांना अटक करणार नाही, तोपर्यंत पोलीस ठाण्यात ठिय्या मांडण्याची भाषा त्याने वापरली होती. पोलिसांनी या प्रकरणाची गांभीर्याने दखल घेऊन त्याला आश्वासन देऊन परत पाठवले होते. मात्र, यानंतर गांधीगेट परिसरातून फहीम खान यांच्या नेतृत्वातील युवक जात असताना त्यांनी नारोबाजी केली. त्यांनी घोषणा दिल्या. त्यामुळे चिडलेले बजरंग दलाचे सदस्य आणि विश्व हिंदू परिषदेच्या सदस्यांनी प्रत्युत्तरात घोषणाबाजी केली. त्यामुळे वाद चिघडला. त्या तरुणांनी गोंधळ घालणे सुरु करताना पोलिसांनी दोन्ही गटांना शांत केले आणि परिसर रिकामा केला.

या घटनेच्या दोन तासांनंतर अचानक दगडफेक सुरु झाली. पोलिसांच्या दिशेने दगड भिरकावणाऱ्या तरुणांचा मोठा जमाव रस्त्यावर आला. त्यामुळे दंगल भडकली. या दंगलीत पोलिसांनी गुन्हे दाखल करुन जवळपास ५१ तरुणांवर गुन्हे दाखल केले. ४६ जणांना ताब्यात घेऊन त्यांना न्यायालयात हजर केले. न्यायालयाने त्यांना पोलीस कोठडीत ठे‌वण्याचे आदेश दिले. मात्र, ही दंगल भडकण्यास कारणीभूत ठरलेला फहीम खान हा पोलिसांना गुंगारा देऊन पळाला होता. मात्र, पोलिसांनी त्याचा शोध घेऊन अटक केली. फहीम शेख खान मायनॉरिटी डेमोक्रॅटिक पार्टीचा नागपूर शहराध्यक्ष आहे. त्यानी २०२४ मध्ये नागपूर विधानसभा निवडणूक लढवली होती, मात्र त्याला फारसे यश मिळाले नाही आणि त्यांची अनामत रक्कमही जप्त झाली होती.

निर्दोष व्यक्तींना अटक, आरोपीच्या वकिलाचा दावा

आरोपींचे वकील अॅड. आसिफ कुरेशी यांनी पत्रकारांशी संवाद साधताना सांगितले की, पोलिसांनी अनेक निर्दोष व्यक्तींना अटक केली आहे. त्यांचे म्हणणे होते की, “ज्या लोकांचा दंगलीशी काहीही संबंध नाही, त्यांनाही अटक करण्यात आली आहे. अनेक जण वेगवेगळ्या कामानिमित्त त्या भागात आले होते, त्यांनाही विनाकारण ताब्यात घेण्यात आले. घरातील लोकांचे सीसीटीव्ही फुटेज तपासून योग्य चौकशी करणे आवश्यक आहे.”

फहीम खानची सखोल चौकशी सुरू

यासंदर्भात पोलिसांनी फहीम खान व त्याच्या काही सहकाऱ्यांना ताब्यात घेतले आहे. त्याला २१ मार्चपर्यंत पोलीस कोठडीत पाठविण्यात आले आहे. याबाबत पोलीस आयुक्त डॉ.रविंद्रकुमार सिंगल यांना विचारणा केली असता आम्ही मास्टरमाईंडचा शोध घेत असल्याचे स्पष्ट केले. जे लोक गणेशपेठेतील बेकायदेशीर जमावात सहभागी झाले होते त्यांनी कुणाला फोन केले याचा सीडीआर काढण्यात येत आहे. तसेच याअगोदर कुठल्या आंदोलनात ते सहभागी झाले होते का, व्हॉट्सअप किंवा सोशल माध्यमांवर त्यांनी काही पोस्ट केली होती का याचा तपास सुरू आहे. यासाठी इतर एजन्सीजचीदेखील मदत घेण्यात येत आहे. आरोपींनी एका व्यक्तीच्या इशाऱ्यावर हे काम केले की राष्ट्रीय पातळीवर एखाद्या संस्थेशी ते जुळले आहेत का याचीदेखील चौकशी सुरू असल्याचे पोलीस आयुक्तांनी स्पष्ट केले.