शेतात दारूचा साठा सापडला, आरोप प्रत्यारोप सूरू.

आर्वीलगत शिरपूर खडकी येथील अश्विन शेंडे यांच्या शेतात हा साठा दिसून आला. पोलिसांनी पहाटे दोन वाजता धाड टाकून हा साठा जप्त केला. या कारवाईवेळी खासदार अमर काळे पण उपस्थित झाले. त्यांनी आरोप केला की हा साठा आम्हीच पकडून दिला असून तो भाजपने मतदारांना प्रभावित करण्यासाठी आणला. शेतमालक हे भाजपचे कार्यकर्ते आहेत. पोलिसांनी वेळीच दखल घेतली असती तर दारू सोबतच पैसाही दिसून आला असता. पण पोलिसांनी वेळेवर कारवाई केली नाही असा आमचा आरोप आहे. आता तरी उचित कारवाई करीत दोषींना शासन करावे असे खासदार काळे म्हणाले. तर भाजपने हा आरोप फेटाळून लावला आहे. भाजपचे उमेदवार सुमित वानखेडे म्हणाले की या निवडणुकीपूर्वी म्हणजे मी उभा नसतांनाही हे असे प्रकार झाले आहेत. मतदानाच्या तोंडावर असे करण्यात कोणाचा हातखंडा आहे, हे इथले ज्येष्ठ मतदार सांगतील. मला हे करण्याचे कारणच नाही. तरी पण पोलीस व निवडणूक प्रशासनाने काय योग्य ती कारवाई करावी, आमचे सहकार्य राहिलच. विरोधकांच्या पायाखालील वाळू सरकत असल्याचे म्हणता येईल, अशी प्रतिक्रिया वानखेडे यांनी दिली.

हेही वाचा…राणांविरोधात बच्‍चू कडूंची ठाकरे गटाच्‍या बंडखोर उमेदवाराला साथ ; म्‍हणाले, “नेतेच आता खतरे मे…”

दारू साठा व आरोपी कोण, यांची चौकशी सूरू असल्याचे पोलीस प्रशासनाने स्पष्ट केले आहे. मात्र ही घटना आर्वीची निवडणूक किती वेगळ्या वाळणावर जात आहे, हे स्पष्ट करते. आम्ही धमाका करू, असे सरसकट भाषणातून बोलल्या जात आहे. त्यामुळे पुढील दोन दिवस निवडणूक कार्यालयासाठी आव्हानात्मक ठरण्याची चिन्हे आहेत. आघाडीच्या मयुरा अमर काळे विरुद्ध युतीचे सुमित वानखेडे अशी इथली लढत होत आहे.

हेही वाचा…निवडणुकीच्या रणधुमाळीत “कुटूंब रंगल प्रचारात”

आर्वी मतदारसंघ या निवडणुकीत विविध कारणांनी राज्यात गाजत आहे. खासदार काळे यांनी पत्नीसाठी आणलेली उमेदवारी, त्यांच्यावर सर्व ईच्छुक उमेदवारांनी टाकलेला बहिष्कार, दादाराव केचे यांचे बंड, त्यासाठी झालेली धावपळ, आता सापडलेला दारू साठा असे धमाके होत आहे. पुढे अधिक काय होणार, अशी चर्चा मतदारसंघात होत आहे.