लोकसत्ता टीम
नागपूर : छत्रपती शिवाजी महाराज आणि छत्रपती संभाजी महाराजांबद्दल आक्षेपार्ह विधान करून इतिहासकार इंद्रजीत सावंत यांना जिवे मारण्याची धमकी देण्याचा आरोप असलेला नागपूर येथील पत्रकार प्रशांत कोरटकर याच्या अटकपूर्व अर्जावरील सुनावणी उच्च न्यायालयाने सोमवारी ठेवली. तोपर्यंत न्यायालयाने अटकेपासून संरक्षणही दिलेले नाही. त्यामुळे प्रशांत कोरटकर हा परदेशी पळून गेल्याचा संशय व्यक्त केला जात आहे.
कोलकाता विमानतळावरुन तो दुबईला पळाल्याचा अंदाज वर्तवला जात आहे. कोरटकरचा दुबईतील एक फोटो सोशल मीडियावर व्हायरल होत आहे. हा फोटो नेमका कधीचा आहे, हे स्पष्ट झालेलं नाही. परंतु पोलिसांच्या हातावर तुरी देत प्रशांत कोरटकर दुबईला पळून गेल्याची चर्चा सोशल मीडियावर रंगली आहे. विशेष म्हणजे तो दोन दिवसांपूर्वी चंद्रपूर येथे होता.
कोल्हापूर सत्र न्यायालयाने अटकपूर्व जामीन फेटाळल्यानंतर कोरटकर याने उच्च न्यायालयात धाव घेतली होती. त्याच्या अटकपूर्व जामिनाच्या याचिकेवर न्यायमूर्ती राजेश पाटील यांच्यासमोर शुक्रवारी प्राथमिक सुनावणी झाली. त्यावेळी, याचिकेची प्रत आपल्याला उपलब्ध झालेली नसल्याचे सरकारी वकिलांनी न्यायालयाला सांगितले. त्यानंतर, न्यायालयाने याचिकेची प्रत सरकारी वकिलांना उपलब्ध करण्याचे आदेश देऊन प्रकरणाची सुनावणी सोमवारी ठेवली.
दरम्यान, कोरटकर याला सत्र न्यायालयाने आधी अटकेपासून अंतरिम दिलासा दिला होता. परंतु, पोलिसांची बाजू न ऐकताच कोरटकरला अटकेपासून अंतरिम दिलासा दिला होता, असा दावा करून सरकारने कोल्हापूर सत्र न्यायालयाच्या आदेशाविरोधात उच्च न्यायालयात धाव घेतली होती. तसेच, कोरटकरला मंजूर केलेला अटकपूर्व जामीन रद्द करण्याची मागणी केली होती. कोरटकर तपासात सहकार्य करत नाहीत आणि तपास अधिकाऱ्यांच्या कार्यालयात उपस्थित राहण्याचे टाळत आहे. त्यामुळे, तपासात अडथळे निर्माण होत असल्याचा दावाही सरकारने ही मागणी करताना केला होता.
पोलिसांनी नुकतीच प्रशांत कोरटकरच्या पत्नीची चौकशी केली होती. त्यावेळी तिने पती चंद्रपूरला गेल्याचं सांगितलं होतं. त्यामुळे कोल्हापूर पोलिसांचं पथक चंद्रपूरला रवाना झालं होतं. परंतु त्याच वेळी कोरटकर दुबईला पळून गेल्याची चर्चा सुरु झाली आहे. मात्र ही जुनी सोशल मीडिया पोस्ट असल्याचा दावाही एकीकडे केला जात असल्याने ट्विस्ट वाढला आहे.