नागपूर : विश्वचषक क्रिकेट स्पर्धेसाठी शहरातील विविध भागांतील क्रिकेट बुकींनी जरीपटका आणि लकडगंजमध्ये बैठक सुरू केली आहे. भारतविरुद्ध न्यूझीलँड संघादरम्यान झालेल्या सामन्यावर क्रिकेट नारा रोडवरील मराठा सावजीच्या वरच्या माळ्यावर सट्टेबाजी सुरू असताना जरीपटका पोलिसांनी छापा घातला. पोलिसांनी युवराज हरयानीला ताब्यात घेतले. मात्र, आर्थिक व्यवहार करून त्याला सोडून दिल्याची चर्चा आहे.
युवराज हरयानी हा शर्मा नावाच्या बुकीच्या आयडीवर क्रिकेटची खायवाडी-लगवाडी करीत होता. नारा रोडवरील मराठा सावजीच्या वरच्या माळ्यावर सट्टेबाजी सुरू होती. जरीपटक्याचे ठाणेदार संतोष बाकल यांच्या पथकाने छापा घातला. युवराजला पोलिसांनी ताब्यात घेतले. त्याला मध्यरात्री एक वाजता पोलिसांनी चौकशी न करता सोडून दिल्याने संशय निर्माण झाला. जरीपटका पोलिसांनी मोठी रक्कम घेऊन युवराजला सोडून दिल्याची चर्चा आहे.
पोलीस आयुक्त अमितेश कुमार यांच्या भीतीमुळे नागपुरातील शंभरावर बुकी भंडारा, गोंदीया, गोवा आणि दुबईला पळाले आहेत. मात्र, काही बुकींनी ठाणेदारांना हाताशी धरून शहरात सट्टेबाजी सुरू केली आहे. जरीपटक्यातील रिंग रोडवर आणि वर्धमानगरातील काही हॉटेलमध्ये बिनधास्त सट्टेबाजी करीत आहेत. जरीपटक्यातील शैलेश, कुकरेजा, जॅकी, आसूदानी, बंटी ज्यूस, खुबानी, पंकज कढी, रवींद्र, शर्मा, सोनी अंडा, राहुल, जनयानी, आकाश बॅटरी, विक्रम, जैसवानी, एस. के, रोहन, गोपानी आणि बंटी यांनी एकत्र येऊन काही पोलीस अधिकाऱ्यांशी हातमिळवणी करून क्रिकेट सट्टेबाजी सुरू असल्याची माहिती पोलिसांच्या ताब्यातील युवराजने दिली होती. त्यामुळे जरीपटका आणि लकडगंज परीसर पोलीस आयुक्तांच्या रडारवर आले आहेत.
शैलू याची अनेक वर्षांपासून काही पोलीस कर्मचाऱ्यांशी मैत्री आहे. खासगी बँकेसाठी दररोज पैसे गोळा करणारा शैलू आता आउटर रिंगरोडवरील कोट्यवधी रुपयांच्या हॉटेलचा भागीदार आहे. याच हॉटेलमध्ये मोठमोठे बुकी जमा होऊन सट्टेबाजी करतात. त्यांना पोलिसांचेच संरक्षण असल्याची माहिती समोर आली आहे.
