अमरावती : दर्यापूरचे काँग्रेसचे आमदार बळवंत वानखडे हे तिवसाच्या आमदार यशोमती ठाकूर यांच्या चपला उचलतात, अशी खोचक टीका अपक्ष आमदार रवी राणा यांनी केली आहे. दर्यापूर मतदारसंघातील अंजनगाव सूर्जी येथे आयोजित दहीहंडी कार्यक्रमात बोलताना रवी राणा यांनी विरोधकांवर जोरदार टीका केली.
आमदार वानखडे यांना अमरावती लोकसभा मतदारसंघातून काँगेसतर्फे उमेदवारी मिळावी यासाठी, स्थानिक काँग्रेस नेते प्रयत्नशील आहेत. वानखडे यांच्या कार्यकर्त्यांनी मोर्चेबांधणी सुरू केली आहे. खासदार नवनीत राणा यांच्या विरोधात ते उमेदवार राहू शकतात, हे लक्षात घेऊन रवी राणा यांनी आता त्यांना लक्ष्य केले आहे.
रवी राणा म्हणाले, वानखडे यांना दर्यापूर मतदारसंघातील लोकांनी आमदार बनवले, पण ते तिवसा मतदारसंघाच्या आमदार यशोमती ठाकूर यांच्या चपला उचलत आहेत. नेत्याच्या खुर्चीला लाथ मारण्याची ताकद असली पाहिजे, त्याला आमदार म्हणतात. त्याच्यात दुसऱ्यांना झुकवण्याची ताकद असली पाहिजे. आता अशी परिस्थिती आहे, की दर्यापूरचे आमदार दुसऱ्या नेत्यांच्या आश्रयाखाली आहेत. ते केवळ चपला उचलण्यात धन्यता मानतात, ते मतदारसंघाचा काय विकास करू शकतील.
आमदार रवी राणा यांनी अमरावती लोकसभा मतदारसंघात प्रचार यंत्रणा राबविण्यास सुरुवात केली आहे. जिल्ह्यात त्यांनी पाच ठिकाणी दहीहंडी कार्यक्रमाचे आयोजन केले आहे. या कार्यक्रमामधून त्यांनी विरोधकांवर शरसंधान केले आहे.
