लोकसत्ता टीम
बुलढाणा: शिवसेना नेते खासदार प्रतापराव जाधव यांचे विश्वासू तथा घाटाखालील जिल्हा प्रमुख शांताराम दाणे यांच्याविरुद्ध स्वपक्षाच्या पदाधिकाऱ्यांनी बंडाचा झेंडा उगारला ! असंतुष्ट पदाधिकाऱ्यांनी थेट मुंबई गाठून दाणे यांना बडतर्फ करण्याची मागणी केली आहे. तसेच कार्यवाही न केल्यास आम्ही ‘पक्षाचे काम बंद’ करणार असा इशाराही त्यांनी दिला.
आणखी वाचा-धक्कादायक! नागपुरातही हडपली पोलिसांची जमीन! राजकीय दबाव, बनावट कागदपत्रांचा आधार
सत्ताधारी शिंदे गटाच्या खामगाव, जळगाव, शेगाव, नांदुरा, संग्रामपूर तालुक्यातील १५ पदाधिकाऱ्यांनी मुंबई गाठून ना उदय सामंत व अन्य नेत्यांची भेट घेऊन आपले गाऱ्हाणे मांडले. जिल्हाप्रमुख दाणे हे गटबाजी करीत असून सेनेच्या उबाठा गटाच्या नेत्यासोबत त्यांचे घनिष्ट संबंध असल्याचा आरोप त्यांनी केला. यामध्ये उप जिल्हाप्रमुख तालुका प्रमुख, शहर प्रमुख यांचा समावेश आहे.त्यांनी पक्षश्रेष्ठींकडे लेखी तक्रार देऊन आरोपांची सरबत्ती च केली आहे . शांताराम दाणे हे गटबाजीचे राजकारण संघटन बांधणीसाठी अडचणी निर्माण करत असून उ बा ठा गटाच्या जिल्हा प्रमुखंसोबत असलेल्या जवळीक मुळे सामान्य शिवसैनिक संभ्रमात पडले आहे. दरम्यान लोकसभा तोंडावर असताना शिवसेनेत मोठी गटबाजी बघायला मिळत आहे.
