लोकसत्ता टीम
बुलढाणा: चिखली शहरात शनिवारी उत्तररात्री दरोडेखोरांच्या टोळीने हैदोस घातला! त्यांनी दाम्पत्याला मारहाण केली असून यात महिला गंभीर जखमी झाली आहे.
चिखली शहरातील गजानन नगर परिसरातील गजानन नवले राहतात. आज उत्तररात्री त्यांच्या घरात ६ दरोडेखोरांनी मागचा दरवाजा तोडून प्रवेश केला. गजानन नवले आणि त्यांच्या पत्नी अलका नवले मागील बाजूला झोपलेल्या होत्या तर नवले यांचे भाऊ पप्पू नवले हे समोरच्या खोलीत झोपले होते. चार चाकी वाहनातून आलेल्या दरोडेखोरांनी पती पत्नीला उठवून सोने कुठे, पैसे कुठे याची विचारणा केली. यानंतर अलका नवले यांच्या हातावर ‘रॉड’ मारून हात मोडला आणि डोक्यावर देखील वार केले.
आणखी वाचा-चंद्रपूर : १९३ कारखान्यांमध्ये अतिधोकादायक रसायनांचा वापर
गजानन नवले यांना देखील बेदम मारहाण केली. अलका नवले यांनी जोरात आरडाओरड केल्याने समोरच्या खोलीत झोपलेले पप्पू नवले धावत आले. शेजारी देखील जागी होऊन घराबाहेर पडले. त्यामुळे दरोडेखोरांनी चारचाकी वाहनातून पळ काढला. परिसरातील नागरिकांनी दरोडेखोरांचा पाठलाग करण्याचा असफल प्रयत्न केला. घटनास्थळी रात्रीच पोलीस दाखल झाले होते. गंभीर जखमी पती पत्नीवर खाजगी रुग्णालयात उपचार सुरू आहे. अलका नवले यांच्या डोक्याला ३५ टाके लागले आहेत.
