धावत्या गाडीतून उतरणे जीवघेणे

नागपूरसह विदर्भाच्या विविध जिल्ह्य़ातून धावणाऱ्या रेल्वेगाडय़ांमध्ये प्रवासादरम्यान धावत्या गाडीतून पडून  गेल्या २१ महिन्यात तब्बल २०५ जणांचा, तर रुळ ओलांडताना ११२ जणांचा मृत्यू झाला. ही आकडेवारी धक्कादायक असून प्रवासात वैद्यकीय सुविधा पुरविणे आणि रुळ  हे फक्त रेल्वेगाडीसाठीच आहे, हे लोकांना सांगूनही अद्याप पटलेले नसल्याचे दिसून येते.

धावत्या रेल्वेगाडीत सर्वाधिक ६४ वर्धा आणि त्यापाठोपाठ नागपूर रेल्वेच्या हद्दीत ४६ मृत्यू झाले आहेत. धावत्या गाडीतून किंवा प्रवास करीत असताना हे मृत्यू झाले आहेत.  रुळ ओलांडताना नागपूर जिल्ह्य़ात सर्वाधिक ३४ जणांचे प्राण गेले आहे. हा तपशील माहिती अधिकार कार्यकर्ते अभय कोलारकर यांनी प्राप्त केला आहे.

वर्धा जिल्ह्य़ात जानेवारी ते नोव्हेंबर या नऊ महिन्यात ३० पुरुषांचा धावत्या गाडीतून पडून मृत्यू झाला . १ जानेवारी २०१८ ते ३० सप्टेंबर २०१८ या दरम्यान नागपूर लोहमार्ग अधीक्षक यांच्या कार्यकक्षेतील गोंदिया, इतवारी, नागपूर, वर्धा, बडनेरा आणि अकोला या जिल्ह्य़ातील रेल्वेच्या हद्दीत झालेले मृत्यू आणि चोरीच्या घटनांचा तपाशील समोर आला आहे. त्यानुसार नागपूर जिल्ह्य़ाच्या परिसरात गेल्यावर्षी २६ पुरुष आणि सहा महिलांचा धावत्या गाडीत मृत्यू झाला, तर चालू वर्षी पहिल्या नऊ महिन्यात १८ पुरुष आणि दोन महिलांचा मृत्यू झाला आहे. रेल्वे प्रवासादरम्यान नैसर्गिक मृत्यूचा आकडा मोठा आहे. नागपूर जिल्ह्य़ात गेल्या २१ महिन्यात १३६ नैसर्गिक मृत्यू झाले. गोंदिया जिल्ह्य़ात ५८ आणि वर्धा जिल्ह्य़ाच्या रेल्वेच्या हद्दीत ६८ मृत्यू झाल्याची नोंद आहे.

४ हजार ४१२चोरीच्या घटना

गेल्या २१ महिन्यात गोंदिया, इतवारी, नागपूर, वर्धा, बडनेरा आणि अकोला रेल्वे हद्दीत चार हजार ४१२ चोरीच्या घटना घडल्या.  यात सर्वाधिक १५३८ घटना नागपूर रेल्वेच्या हद्दीत घडल्या आहेत. या घटना बघता रेल्वेचा प्रवास सुरक्षित नसल्याचे पुन्हा एकदा स्पष्ट झाले आहे.