लोकसत्ता टीम
यवतमाळ : जिल्ह्याचे पालकमंत्री संयज राठोड हे नेहमी नवनवीन प्रयोग करून पाहत असतात. धुलिवंदनाला बंजारा बांधवांसोबत लेंगी नृत्यावर त्यांनी ठेका धरला होता.
शनिवारी नवीन बसेसच्या लोकार्पण सोहळ्यात त्यांनी चक्क बससे स्टेअरिंग हाती घेवून बस चालवत आगळ्या वेगळ्या पद्धतीने महाराष्ट्राच्या लोकवाहिनीचे लोकार्पण केले. विधानसभा निवडणुकीपूर्वी येथे नवीन बसस्थानकाचे उद्घाटन झाले.
मात्र, नवीन बसस्थानकातून सुटणाऱ्या बसेस या जुन्याच आणि भंगार अवस्थेतील आहेत. हेच हेरून पालकमंत्री संजय राठोड यांच्या प्रयत्नाने जिल्ह्यातील नऊ एसटी आगारांना प्रत्येकी १० याप्रमाणे एकून ९० नव्याकोऱ्या बसेस प्राप्त होत आहे. त्यापैकी यवतमाळ व उमरखेड या आगारांना शनिवारी प्रत्येकी पाच बसेस प्राप्त झाल्या.
यवतमाळ बसस्थानकावर या बसेसचे लोकार्पण शनिवारी संध्याकाळी पालकमंत्री संजय राठोड यांच्या हस्ते झाले. या वेळी बसेसचे परंपरेप्रमाणे पूजन करून लोकार्पण केल्यानंतर उपस्थितांच्या आग्रहामुळे त्यांनी चक्क चालकाच्या सीटवर बसून, बस काही अंतर चालवत नेत खरेखुरे लोकार्पण केले. यावेळी बोलताना त्यांनी जिल्ह्यातील सार्वजनिक वाहतूक व्यवस्था बळकट करण्यावर आपला भर असल्याचे सांगितले.
राज्य परिवहन महामंडळाची एसटी बस राज्याची लोकवाहिनी म्हणून ओळखली जाते. ग्रामीण भागात अजूनही बस हीच वाहतूकीचे प्रभावी साधन आहे. जिल्ह्याच्या कानाकोपऱ्यात प्रवाशांची ने-आण करणाऱ्या बसेस जून्या झाल्या आहेत. तसेच त्यांची संख्याही अपुरी आहे. त्यामुळे जिल्ह्याला नवीन बसेस उपलब्ध करून देण्यात याव्यात, अशी मागणी पालकमंत्री संजय राठोड यांनी परिवहन मंत्र्यांकडे केली होती.
त्या मागणीस प्रतिसाद म्हणून पहिल्या टप्प्यात जिल्ह्यातील यवतमाळ आणि उमरखेड या दोन आगारांस १० नवीन बसेस प्राप्त झाल्या. उर्वरित सात आगारांनाही लवकरच या बस उपलब्ध होणार असल्याचे यावेळी पालकमंत्री राठोड यांनी सांगितले.
यवतमाळ आगारास प्राप्त बसेसचे लोकार्पण पालकमंत्री संजय राठोड यांच्याहस्ते, यवतमाळचे आमदार बाळासाहेब मांगुळकर, आगार प्रमुख छगन दिवसे, यंत्र अभियंता नरसिंग चव्हाण, विभागीय वाहतूक अधिकारी दादाराव दराडे, शिवसेना जिल्हाप्रमुख श्रीधर मोहोड, जिल्हा संपर्क प्रमुख हरिहर लिंगनवार आदींच्या उपस्थितीत झाले.
यावेळी पालकमंत्री व अन्य मान्यवरांनी फित कापून एसटी बसेसचे प्रवाशांच्या सेवेसाठी लोकार्पण केले पण पालकमंत्र्यांनी चक्क बस चालवून तिचे लोकार्पण केल्याने त्याचीच चर्चा रंगली. समाज माध्यमांमध्ये हा व्हिडीओ सार्वत्रिक झाला आहे.
