Saoner Vidhan Sabha Election 2024 : सावनेर हे नागपूर जिल्ह्यातील एक शहर आणि तालुका असून ते कोलार नदीकाठी वसलेले आहे. हे शहर नागपूरपासून सुमारे ३६ किलोमीटर अंतरावर आहे. सावनेर ऐतिहासिक आणि पौराणिकदृष्ट्या महत्त्वाचे आहे. नदीकाठी असलेले हेमाडपंती शिव मंदिर हे नागरिकांसाठी श्रद्धेचे ठिकाण आहे. १९४२ च्या ब्रिटिशांविरुद्धच्या भारत छोडो आंदोलनातील भूमिकेमुळेही सावनेरला ऐतिहासिक महत्त्व आहे. शेती हा येथील नागरिकांचा मुख्य व्यवसाय आहे. कोळसा खाण, कापड आणि कागद उद्योग हे येथील आर्थिक वाढीला हातभार लावतात.
सावनेर हा रामटेक लोकसभा मतदारसंघाचा भाग आहे. सुनील छत्रपाल केदार हे सावनेर मतदारसंघाचे प्रतिनिधित्व करत होते. लोक प्रतिनिधीबरोबरच केदार हे व्यापारी आणि शेतकरीदेखील आहेत. १९९५ आणि २००४ साली असे दोनवेळा ते अपक्ष म्हणून सावनेर विधानसभा मतदारसंघातून विधानसभेवर निवडून गेले होते. मात्र २००९, २०१४ आणि २०१९ च्या विधानसभा निवडणुकीत ते सावनेर मतदारसंघातून काँग्रेसपक्षातर्फे विधानसभेवर निवडून गेले. सावनेर विधानसभा मतदारसंघाचे प्रतिनिधित्व करताना त्यांनी विविध खात्यांचे मंत्रीपद भूषविले आहे.
सुनील केदार पाचवेळा सावनेर मंतदारसंघातून निवडून आले आहेत. केदार यांची नागपुरातील ग्रामीण भागातील राजकारणावर चांगली पकड असल्याचे बोलले जाते. मात्र, २५ वर्षे जुन्या नागपूर जिल्हा मध्यवर्ती सहकारी बँक घोटाळ्याप्रकरणी दोषी आढळल्याने नागपूर उच्च न्यायालयाने सुनील केदार यांना ५ वर्षे तुरुंगवासाची शिक्षा सुनावली. यानंतर २४ डिसेंबर २०२३ रोजी सुनील केदार यांना महाराष्ट्र विधानसभेचे सदस्य म्हणून अपात्र ठरवण्यात आले असून केदार यांना सहा वर्षे निवडणूक लढवता येणार नाही.
सावनेर हा केदार यांचा बालेकिल्ला आहे. मात्र आता २०२४ च्या विधानसभा निवडणुकीत केदार या मतदारसंघातून लढण्याची शक्यता कमीच आहे. त्यामुळे काँग्रेससमोर पर्यायी उमेदवार शोधणे हे आव्हानात्मक असणार आहे. केदार यांच्या कुटुंबातील सदस्याला उमेदवारी मिळेल का? याबाबतही उत्सुकता आहे. आशिष देशमुख हे सुनील केदार यांचे विरोधक मानले जातात. देशमुख हे १९९५ आणि २००९ साली असे दोन वेळा सुनील केदार यांच्या विरोधात सावनेर येथून विधानसभा निवडणुकीला उभे राहिले होते. मात्र केदार यांनी देशमुख यांना पराभूत केले होते. यंदा भाजपकडून आशिष देशमुख यांना पुन्हा सावनेर मतदारसंघातून निवडणुकीत उतरवण्याची शक्यता आहे.
