नागपूर : शंकरनगरच्या सरस्वती विद्यालयातील सहलीला निघालेल्या ट्रॅव्हल्स बसचा हिंगणाजवळ अपघात झाला. अपघातानंतर ट्रॅव्हल्स मालकाकडून तातडीने जखमींना मदत अपेक्षित होती. परंतु ट्रॅव्हल्स मालक या प्रकरणात दोषी आढळू नये, यासाठी अपघातानंतर नागपूर ग्रामीण आरटीओ कार्यालयालत अपघातग्रस्त बसच्या परवान्यासाठी धावपळ करत होता. या बसची नियमबाह्य पीयूसीही त्याने काढली.
अपघातग्रस्त बस नागपूर ग्रामीण आरटीओत नोंदणीकृत आहे. तिचा क्रमांक एमएच- ४०, वाय- ७३५० असा आहे. ही बस वैभव वालके यांच्या नावावर आहे. अपघातानंतर संबंधित बस मालकाने विद्यार्थ्यांच्या मदतीसाठी धावणे अपेक्षित होते. परंतु त्याने कायद्याच्या कचाट्यातून वाचण्यासाठी धावपळ सुरू केली. अपघातग्रस्त बसचा कर १५ फेब्रुवारी २०२४ पर्यंतच भरला होता. त्यामुळे बस मालकाने करापोटीचे १ लाख १ हजार २३६ रुपये तडकाफडकी ऑनलाईन भरले. बसची पीयूसीही नव्हती. पूर्व नागपूर उपप्रादेशिक परिवहन कार्यालयाच्या अखत्यारित असलेल्या पीयूसी केंद्रातून ती वेळेवर काढली गेली. परंतु नागपूर ग्रामीण आरटीओतील अधिकाऱ्यांनी हा प्रयत्न हाणून पाडला. वाहन उपलब्ध नसतानाही पीयूसी निघाली कशी, हाही प्रश्न या घटनेनंतर उपस्थित झाला.
अपघातग्रस्त वाहनावर तीन ‘चालान’
अपघातग्रस्त बसवर तीन चालान आहेत. त्यातील एक चालान ६ फेब्रुवारी २०२३ रोजी विनापरवाना राजस्थानमध्ये बस नेल्याचा, दुसरे चालान २२ जुलै २०२३ रोजी सोलापूर परिसरात बसमध्ये अग्निशमन यंत्र, प्रथमोपचार संच, नोंदणी चिन्ह स्पष्ट नसण्याचा तर तिसरे चालान ५ ऑक्टोबर २०२३ रोजी नागपूर ग्रामीण आरटीओ परिसरात नियमभंग केल्याचा आहे. यापैकी एकही चालन बस मालकाने भरला नाही.
सहलीतील इतर बसेसची वैधताही वादात
सहलीसाठी एकूण पाच बसेस गेल्या होत्या. त्यापैकी नागपूर ग्रामीण आरटीओ कार्यालयात नोंद असलेल्या एका बसचा अपघात झाला असला तरी इतर पूर्व नागपूर आरटीओ कार्यालयातील ३, नागपूर शहर आरटीओतील १ अशा एकूण चार बसेसच्या वैधतेवरही प्रश्न उपस्थित होत आहे. अपघात झाल्यावर इतर एका बसमालकानेही परवाना निर्गमित केल्याची माहिती आहे.
हेही वाचा – अवकाशात पंच ग्रह दर्शन, खगोल प्रेमींसाठी अनोखी पर्वणी…
“अपघातग्रस्त बसचा परवाना ऐनवेळी मिळवण्याचा प्रयत्न झाला. अशा घटनेमुळे सर्व शाळांनी सहलीसाठीची बस निश्चित करताना सर्व माहिती घेणे गरजेचे आहे. असे प्रकार टाळण्यासाठी शिक्षण विभागासह इतरांशी समन्वय साधून योग्य ती कारवाई केली जाईल. विद्यार्थ्यांना धोका होईल असे कोणतेही कृत्य खपवून घेतले जाणार नाही.” – विजय चव्हाण, प्रादेशिक परिवहन अधिकारी, नागपूर ग्रामीण.
