लोकसत्ता टीम
नागपूर : शहरात आणखी ‘हिट अॅन्ड रन’ची घटना उघडकीस आली आहे. भरधाव स्कूलव्हॅनच्या चालकाने रस्त्याने पायी जात असलेल्या दोघांना धडक दिली आणि फरार झाला. यात दोघेही गंभीर जखमी झाले. रुग्णालयात उपचारादरम्यान सासऱ्याचा मृत्यू झाला, तर जावयावर उपचार सुरू आहेत. ‘हिट अॅन्ड रन’ ही घटना कोराडी ठाण्यांतर्गत बोखारा परिसरात घडली. जयराम असाडू पवार (५५) असे मृताचे नाव आहे. पोलिसांनी जखमी संतोष शंकर राठोड (३५) च्या तक्रारीवरून आरोपी वाहन चालकाविरुद्ध गुन्हा नोंदविला आहे. गेल्या सहा महिन्यांपासून नागपुरात हिट अँड रनच्या घटनांमध्ये सातत्याने वाढ होत असल्याचे निदर्शनास आले आहे. वाहतूक पोलिसांच्या हलगर्जीपणामुळे रस्ते अपघातात वाढ होत असल्याचे दिसून येते.
पोलिसांकडून मिळालेल्या माहितीनुसार, जयराम जाधव आणि त्यांचा जावई संतोष राठोड हे दोघेही मुळचे छिंदवाडाच्या अमरवाडा येथील रहिवासी आहेत. दोघेही मजुरीचे काम करण्यासाठी नागपुरात आले होते. बोखारा परिसरातील एका बांधकामावर त्यांना काम मिळाले होते आणि तेथेच रहात होते. मंगळवारी सायंकाळी ७ वाजताच्या सुमारास दोघेही बोखारा रेल्वे क्रॉसिंगजवळून पायदळ गृहपयोगी सामान खरेदी करण्यासाठी जात होते. हंस बिअर बारजवळ स्कूल व्हॅन क्र. एमएच-३१/ईएम-००८९ च्या चालकाने त्यांना मागून जबर धडक दिली आणि फरार झाला. यात जयराम आणि संतोष हे दोघेही गंभीर जखमी झाले. अपघात होताच मोठी गर्दी जमा झाली.
दरम्यान अपघात करुन स्कूलव्हॅनचालक वाहनासह पळून गेला. स्थानिक नागरिक मदतीला धावले. घटनेची माहिती मिळताच कोराडी पोलीस घटनास्थळी पोहोचले. दोघांनाही जवळच्या रुग्णालयात घेऊन गेले. मात्र प्रकृती चिंताजनक असल्याने त्यांना मेडिकल रुग्णालयात दाखल करण्यात आले. मेडिकलच्या डॉक्टरांनी जयराम यांना मृत घोषित केले. पोलिसांनी संतोषच्या तक्रारीवरून आरोपी चालकाचा शोध सुरू केला आहे.
राज्यात १५,३३५ जणांचा अपघाती मृत्यू
गेल्या वर्षभरात राज्यात रस्ते अपघाताच्या संख्येत वाढ झाली आहे. २०२४ मध्ये ३६८४ रस्ते अपघात झाले आहेत. त्यामध्ये १५ हजार ३३५ जणांचा मृत्यू झाला होता. तसेच २०२३ मध्ये ३५२४३ रस्ते अपघात झाल्याची नोंद आहे. या अपघातात १५ हजार ३६६ जणांचा मृत्यू झाल्याची नोंद राज्य शासनाकडे आहे. त्यामुळे दिवसेंदिवस रस्ते अपघात मृतांची संख्या वाढत असल्याचे लक्षात येते.
