वर्धा : सार्वजनिक उद्यानाच्या सुरक्षा रक्षकाने एकतर्फी प्रेमातून तेथील महिला कर्मचाऱ्याच्या अंगावर अॅसिड फेकून जाळण्याची खळबळ – जनक घटना गुरुवारी रात्री घडली. शहराच्या मध्यभागी असलेल्या महावीर उद्यानात रात्री चांगलीच वर्दळ असते. त्यामुळे सुरक्षारक्षक नेमण्यात आले आहेत. यापैकी एक अर्जुन चाफले याने उद्यानाच्या तिकीट खिडकीवर बसलेल्या पीडितेच्या अंगावर अॅसिडसारखे ज्वलनशील द्रव्य फेकले.
प्रसाधनगृह स्वच्छ करण्यासाठी वापरण्यात येणारे हे द्रव्य असल्याचे सांगितले जाते. पीडितेने वेळीच सावध होत चेहऱ्यावर ओढणी ओढली. पण तरीही हातावर व पाठीवर दाहक पदार्थ पडल्याने तो भाग जळाला. तिला त्वरित सेवाग्रामच्या रुग्णालयात दाखल करण्यात आले असून तिची प्रकृती धोक्याबाहेर आहे. या घटनेने उद्यानात चांगलीच खळबळ उडाली. पोलीस अधीक्षक प्रशांत होळकर व अन्य वरिष्ठांनी घटनास्थळी भेट देऊन आरोपी अर्जुन यास अटक केली.
